Anna Danılına alǵash ret álemdegi úzdik on tennısshiniń qataryna kirdi
Qazaqstan tennıs federatsııasynan málim etkendeı, A.Danılına búgin jańartylǵan álemdik reıtıngide 11-den 10-orynǵa kóterildi.
Bul – onyń sporttyq jolyndaǵy jeke rekordy.
A.Danılına úndistandyq Sanıa Mırzamen birge Adelaıda-2 (Aýstralııa) WTA 500 týrnıriniń alǵashqy aınalymynda búgin osy jarystyń birinshi raketkalary, chehııalyq Barbora Kreıchıkova – aýstralııalyq Storm Sanderspen sheberlik baıqasty.
Tartysty kezdesýde birinshi partııada qazaqstandyq-úndistandyq jup basymdylyq tanytty – 6:3. Ekinshi sette qarsylastary dál sondaı eseppen ese qaıyrdy – 6:3. Sýper taı-breıkte B.Kreıchıkova men S.Sanders jeńisti julyp aldy – 10:6.
Endi A.Danılına S.Mırzamen birge jyldyń basty týrnırleriniń biri – Aýstralııa ashyq chempıonatynda óner kórsetedi.
Eske sala keteıik, budan buryn Aleksandr Býblık Jańa Zelandııadaǵy jarysta baq synaıtynyn jazǵan bolatynbyz.
Elena Rybakına Aýstralııadaǵy jarysta jeńilip qaldy.
Foto: Qazaqstan tennıs federatsııasy