Anna Bashınskaıaǵa qatysty másele tez arada AMANAT partııasynyń tıisti qurylymdarynda qaralady – Stanıslav Kankýrov

ASTANA. QazAqparat – Máseleni tez arada partııanyń tıisti qurylymdarynda qarastyratyn bolamyz. «AMANAT» partııasy Almaty qalalyq fılıalynyń tóraǵasy Stanıslav Kankýrov áleýmettik jelide daý týdyrǵan qalalyq Máslıhat depýtaty A.Bashınskaıanyń isine qatysty Facebook paraqshasynda osylaı dep jazdy, dep habarlaıdy QazAqparat.

«Qadirli áleýmet! A.Bashınskaıanyń bul pikiri partııanyń kózqarasyn bildirmeıdi. «AMANAT» partııasy ózge elderdiń saıasatyna aralaspaıdy.

A.Bashınskaıa abaısyzda qatelikpen jazylǵan pikiri úshin óz tarapynan keshirim surady. Degenmen, aıtylǵan sózdiń aýyrtpalyǵy men onyń saıası astaryn eskere otyryp, bul máseleni partııa beı-jaı qaldyrmaıdy.

Máseleni tez arada partııanyń tıisti qurylymdarynda qarastyratyn bolamyz.

Árbir jergilikti máslıhat depýtaty ózi turyp jatqan memlekettiń múddesin basty orynǵa qoıýy tıis»,-dep jazdy Stanıslav Kankýrov.

Aıta keteıik, osyǵan deıin Almaty qalalyq Máslıhatynyń depýtaty Anna Bashınskaıa Ýkraına Prezıdenti Vladımır Zelenskııdiń «Deutsche Welle» basylymyna bergen suhbatynda Qyrymdy qaıtarý týraly málimdemesine «Zelenskıı myrza, Qyrymnan kóri Túrkııa durys, ol jaqtyń aýa raıy qolaıly», degen maǵynada pikir bildirdi.

Depýtattyń bul pikiri áleýmettik jeli qoldanýshylarynyń narazylyǵyn týdyryp, olar depýtattyń mandatyn tapsyrýyn talap etti.

Keıinirek depýtat osy pikiri úshin qazaqstandyqtardan keshirim surady.