Ankarada Uly dalanyń uly tulǵalary ulyqtaldy
Bul jıyn ǵalym ári fılosof Ábý Nasyr ál-Farabıdiń týǵanyna 1150 jyl jáne aqyn ári oıshyl Abaı Qunanbaıulynyń týǵanyna 175 jyl tolýyna oraı 2020 jyly bastalǵan eske alý sharalarynyń úılesimdi jalǵasy boldy. 2021 jyly Uly dala aqyndyq dástúriniń kórnekti ókili Jambyl Jabaevtyń týǵanyna 175 jyl tolyp otyrǵany málim.
Іs-sharada sóz sóılegen Qazaqstan Elshisi Abzal Saparbekuly 2020 ál-Farabı jáne Abaı jyly aıasynda Túrkııada qyrýar sharýa atqarylyp: kóshelerge, parkter men túrli mekemelerge dala danyshpandarynyń attary berilgenin, eskertkishteri ashyldy, kitaptary túrik tilinde jaryq kórgenin jetkizdi. 2021 jyly Jambyldyń murasyn tanytý jyly bolatynyn aıtqan Elshi Jambyldyń shyǵarmalaryn qazaq halqynyń mádenı entsıklopedııasy jáne rýhanı qazynasy retinde sıpattady.
2021 jyldyń búkil Túrki álemi úshin mańyzdy mereıtoılardy atap ótetin jyl bolatynyn eske salǵan A.Saparbekuly elimizdiń táýelsizdiginiń 30 jyldyq mereıtoıynyń atalyp ótiletinin aıtty. Elshi Túrkııanyń Qazaqstannyń táýelsizdigin alǵash moıyndaǵan el bolǵanyn atap ótip, «Osyǵan baılanysty Túrkııada biz keń aýqymdy is-sharalar ótkizýdi josparlap otyrmyz», - dedi. Elshi táýelsizdiktiń 30 jyldyǵymen qatar, Qazaqstan tarıhyndaǵy birqatar mańyzdy oqıǵalardyń jyldyqtary men belgili tulǵalardyń mereıtoılarynyń atalyp ótelitinin málimdedi.
Іs-sharada sóz sóılegen Halyqaralyq Túrki akademııasynyń Prezıdenti Darhan Qydyráli túrik halqyna atajurt Qazaqstannyń ystyq sálemin bildire otyryp, pandemııaǵa qaramastan, Abaı mereıtoıynyń Túrkııada óte aýqymdy toılanýynyń túrik halqynyń Qazaqstanǵa degen ystyq yqylasynyń kórsetkishi bolyp tabylatynyn aıtty. «Ahmet ıAsaýı, Sultan Alparslan, Hajy Bektash Velı, Ahı Evran, Farabı, Abaı jáne Jambyl – bizdiń ortaq qundylyqtarymyz» dep aıtqan D.Qydyráli osy tulǵalar arqyly túrki áleminiń birligi nyǵaıyp kele jatqanyna nazar aýdardy.
Eýrazııa jazýshylar odaǵynyń tóraǵasy ıAkýp Ómeroǵlý ál-Farabı, Abaı jáne Jambylǵa arnalǵan osy is-shara bolǵan kúni Ankarada danyshpan Tonykóktiń eskertkishiniń ashylýyn jaqsylyqtyń bir nyshany dep jordy. Ómeroǵlý «Dala ádebıetiniń uly aqyny Jambyl» kitabynyń avtory Myrzataı Joldasbekovtyń óz eńbeginde Orhon eskertkishteri men Jambyldyń aqyndyq dástúri arasyndaǵy sabaqtastyqty pash etkenin málimdedi.
Іs-sharada sóz sóılegen TÚRKSOI Bas hatshysy Dúısen Qaseınov 2020 jyly ál-Farabı men Abaı jylyna arnalǵan is-sharalar týraly aqparat berdi. Ál-Farabıdiń «Mýzykanyń úlken kitaby» arabshadan túrikshege aýdarylyp jatqanyn aıtqan D.Qaseınov jańa basylymnyń jaqynda oqyrmandarymen qaýyshatynyn jetkizip, súıinshi berdi. Sonymen birge, ol TÚRKSOI-dyń 2021 jyly Jambyldyń mereıtoıynyń laıyqty túrde atap ótý úshin bar kúshimen jumys isteıtinin málimdedi.
Saltanatty sózderden keıin M.Joldasbekovtyń «Dala ádebıetiniń uly aqyny Jambyl» kitabynyń túrikshege aýdarylǵan nusqasynyń tusaýkeseri boldy. Osydan keıin, 2020 jyly ál-Farabı men Abaıdyń Túrkııada tanylýyna úles qosqan ǵalymdar, jýrnalıstter men memlekettik qaıratkerler QR Prezıdentiniń, Halyqaralyq Túrki akademııasynyń, QR Mádenıet jáne sport mınıstrliginiń jáne Qazaqstan Elshiliginiń alǵys hattary jáne medaldarymen marapattaldy. Atap aıtqanda, «Ulttyq kózqaras» jýrnalynyń bas redaktory, Túrkııa Parlamenti depýtaty Metın Gúndoǵdýǵa, TRT Avaz arnasynyń úılestirýshisi Sedat Saǵyrkaıaǵa jáne Pamýkkale ýnıversıtetiniń professory Nergız Bıraıǵa Prezıdent Qasym-Jomart Toqaevtyń alǵys hattary tabystaldy.