Ankarada qymyz festıvali ótti
QR Syrtqy ister mınıstrligi baspasóz qyzmetiniń habarlaýynsha, is-sharaǵa TÚRKSOI Bas hatshysy Sultan Raev, Qazaqstannyń Túrkııadaǵy Elshisi Erkebulan Sápıev, Astana qalasynan «Uly taǵzym» qoǵamdyq uıymy dırektorynyń orynbasary Nurlan Omarov, Dúnıejúzi qazaqtaryn damytý qorynyń tóraǵasy Erlan Baıyn, qazaq dıasporasy men zııaly qaýym ókilderi, qazaqstandyq stýdentter, Ankaranyń jergilikti halqy men buqaralyq aqparat ókilderi qatysty.
Festıvaldiń ashylýynda sóz alǵan Qazaqstan Elshisi E. Sápıev qazaq halqynyń salt-dástúri men ádet-ǵurpyn dáripteıtin mundaı festıval bıyl Anadolynyń júregi Ankarada alǵash ret ótkizilip otyrǵanyn, jalpy qymyz túrki mádenıetiniń mańyzdy bir bóligi bolyp tabylatynyna nazar aýdaryp, Qazaqstanda «Qymyz Fest» mereke retinde atalyp ótetinin baıandady.
Bas hatshy S. Raev óziniń sózinde «búgin Túrki áleminiń ortaq dástúri bolyp tabylatyn dámdi qymyz sýsynyn tanystyrý maqsatynda osyndaı festıvaldiń alǵash ret uıymdastyrylyp otyrǵanyna qýanyshyn bildirip, qymyz – túrki halyqtaryna ǵasyrlar boıy serik bolǵan jylqy sútinen jasalǵan, qymyz-qazaq-qyrǵyz ajyramas uǵymdar» ekenin atap ótti.
N. Omarov sózinde búgingi qymyz merekesi alǵash ret resmı túrde Qazaqstannan tys baýyrlas Túrkııa elinde ótýi eki baýyrlas eldiń tarıhynda iz qaldyratyn oqıǵa ekenin, «Qymyz merekesi» Eýropa men Qytaı elderiniń tarıhshylar men saıahatshylarynyń jazba derekterinde jazylǵanyn jáne jalpy túrki halyqtarynyń eń basty merekesi bolyp tabylatynyn baıandady.
Іs-shara barysynda qatysýshylar qazaq halqynyń ulttyq sýsyny – qymyzdyń ázirlený joldarymen tanysty. Aldymenen jelbaý tartyldy, qulyndar baılandy, bıe saýyldy, saýmal kúbige quıyldy, qymyzdyń ázirlený joldary kórsetildi. Festıvalge qatysqan qonaqtarǵa qymyz ben qazaqtyń dástúrli taǵamdary usynyldy jáne qazaqtyń áni men kúıi oryndaldy.
«Qymyz festıvaline kelgen qonaqtar men jergilikti halyq úlken qyzyǵýshylyq tanytty. Qazaqstan men Túrkııanyń buqaralyq aqparat quraldarynda keńinen jarııalandy»,-delingen habarlamada.