Ankarada qazaqstandyq stýdentter Elbasy maqalasyn talqylady

ANKARA. QazAqparat - Prezıdent Nursultan Nazarbaevtyń «Uly dalanyń jeti qyry» atty maqalasy Ankarada Túrkııada bilim alyp júrgen qazaqstandyq stýdentter arasynda talqylandy. Aıta keterligi, Ankarada stýdenttermen belgili saıasattanýshy, tarıhshy ǵalym Berik Ábdiǵalıuly kezdesken bolatyn.

Kezdesý barysynda jýrnalıstıka, tarıh, kompıýter ınjenerııasy, dintaný sııaqty túrli mamandyqtarda magıstratýra men doktorantýrada oqyp júrgen stýdentter Prezıdent Nazarbaevtyń maqalasyn jyly qabyldaǵanyn, ondaǵy maqsat-mindetterdiń mańyzdylyǵyn atap ótti. Máselen, Konııa qalasynan kelgen fılolog Eldos Súleımen «Arhıv-2025» jobasynan kóp úmit artatynyn, álemde Qazaqstanǵa qatysty ashylmaı jatqan derektiń kóp ekendigine nazar aýdartty. Al, dombyrashy Erjan Arqabaı ortaq mádenıet pen mýzykanyń, ádebıet pen fılosofııanyń túrki álemi úshin mańyzyn alǵa tartady. Onyń ózi de Ankarada dombyra kýrsyn ashqan. Baba murasyna qyzyǵýshylar sany kún sanap artyp keledi eken.

  Óz kezeginde Berik Ábdiǵalı Elbasy maqalasy halyqtyń rýhyn kótergenin atap ótti. «Babalarymyzdyń atty álemde alǵash qolǵa úıretkeni bizge maqtanysh sezimin syılaıdy. Buryn da biletinbiz, biraq ony Elbasynyń aıtqany bólek. Óıtkeni bizge shyn máninde maqtanysh sezimi jetispeı júr. Ol sezim - jurtty rýhtandyrady. Rýh degenimiz - ulttyq kod, qazaqsha aıtqanda - tektilik. Tek ketpeıdi, ózin izdeıdi. Biz ókinishke qaraı, sonshama jyl bodandyqta bolyp azat rýhymyzdy túsirip aldyq. Ózimizdi kóshten keıin qalǵandaı sezinetin kompleks, kembaǵaldyq sana paıda boldy. Sondyqtan da biz durys maqtana bilmeı júrmiz. Osydan arylýdyń joly Elbasy maqalasynda anyq kórsetilgen», - deıdi Berik Ábdiǵalı.

Onyń aıtýynsha, memlekettik sanany kóterip, rýhty bıiktetin tarıhtaǵy esimi uly tulǵalar, batyrlar men erlik dastandary. Sondyqtan ultty biriktiretin tulǵalardyń erlikteri, handarymyzdyń qaıratkerligi, danalardyń daralyǵy urpaqqa kóbirek nasıhattalýy shart.

«Qazaq halqy ǵasyrlar boıy janshylyp kelgen batyrlyq rýhyn qalpyna keltire almaı jatyr. Ulttyń ulttyq kody ashtyqtan, repressııa men qýdalaýdan báseńsip qaldy. Sondyqtan, Ulttyq rýhymyzdy tiriltýge, memlekettik sanamyz ben ulttyq tutastyǵymyzdy qalyptastyrýǵa, keýdesin maqtanysh kernegen halyq bolýymyzǵa, tutas tarıhı sana-sezimdi qalyptastyrýǵa Elbasy maqalasynyń mańyzy zor. Osy maqala aıasynda ǵalymdarǵa úlken júk artylyp otyr. Arǵy tegimizdi zerttep, uly halyqtyń murageri ekenimizdi dáleldeý, derekterdi ǵylymı aınalymǵa engizý ǵalymdardyń jumysy», - dedi Berik Ábdiǵalı.