Ankarada ata-ana balany mektepke daıyndaýǵa qansha aqsha jumsaıdy

ANKARA. QazAqparat – Túrkııada oqý jylynyń bastalýyna eki aptadan az ýaqyt qaldy, munda mektepterde oqý qyrkúıektiń ortasynan bastalady. Qaladaǵy dúken sóreleri ártúrli mektep taýarlaryna toly, biraq baǵasy da arzan emes. Ankarada ata-ana balany mektepke daıyndaýǵa qansha aqsha jumsaıtyny týraly QazAqparat tilshisi aıtyp beredi.

Bıyl balalaryn mektepke daıyndaýmen aınalysatyn kóptegen otbasy oqý quraldary baǵasynyń aıtarlyqtaı óskenin baıqaǵan.

Túrkııada ata-analar aldaǵy oqý jylynda balalarynyń oqý qajettilikterin qalaı qanaǵattandyrýǵa bolatynyn oılap jatyr. Jergilikti turǵyndar kóptegen taýar men qyzmetter baǵasynyń aıtarlyqtaı óskenin atap ótti.

Máselen, 2022 jyly otbasy bir balaǵa shamamen 1000 túrik lırasyn (shamamen 55 dollar) jumsady. Bul aqshaǵa shalbar, kóılek jáne jempir satyp alynǵan. Bıyl dál sol taýarlar úshin soma 3600 túrik lırasyna jetti (qazirgi baǵam boıynsha 130 dollardan asady).

Ótken jyly qarapaıym krossovka orta eseppen 450 lıraǵa satyp alynsa, bıyl onyń baǵasy kem degende 800 lıraǵa deıin kóterildi. Balalarǵa arnalǵan klassıkalyq úlgidegi aıaq kıim buryn 400 lıraǵa satyp alynsa, búginde baǵasy – 900 lıra. Túrkııada bir oqýshyǵa ǵana kıim-keshek pen aıaq kıim baǵasy ortasha eseppen 3000-5000 túrik lırasy jumsalady.

Byltyr bastaýysh jáne joǵary synyp oqýshylarynyń negizgi keńse shyǵyndaryna shamamen 550 lıra jumsalsa, bıyl ortasha soma 1650 lıra boldy. 2022 jyly bir rıýkzaktyń quny ortasha eseppen 229 lıra bolsa, qazir ol 645 lıraǵa satylady.

Qarapaıym qaryndashtyń quny 29 lıra bolsa, qazir 130 lır turady. Sol sııaqty ishinde 12 túrli tústi qaryndashy bar qoraptyń baǵasy 33 lıradan 149 lıraǵa kóterildi.

Sonymen qatar balalardy úıden mektepke jetkizý aıyna 792 lıradan 1506 lıraǵa deıin kóterildi. Bul ata-ananyń báriniń birdeı qaltasy kótere bermeıtin soma ekenin aıta ketken jón. Byltyr bir oqýshynyń aılyq tamaǵy 420 lıra bolsa, bıyl 1220 lıraǵa jetti.

Túrik azamattarynyń aıtýynsha, eń tómengi jalaqynyń sońǵy ýaqytta kóterilýi bul jaǵdaıdy ózgertpeıdi. El ekonomıkasyndaǵy ınflıatsııa halyqtyń alǵan aqshasyn «jeıdi». Jańa oqý jylynyń bastalýyna az ǵana ýaqyt qaldy, al turǵyndar jalpy baǵanyń aıtarlyqtaı óskenin sezinip otyr.

Ekonomısterdiń esebinshe, mektepte bir balaǵa shaqqandaǵy bilimniń ortasha quny 120 paıyzǵa ósken. Jańa oqý jylynda oqýshyny mektepke daıarlaýdyń jalpy somasy shamamen 6700-7000 túrik lırasy, bul teńgemen eseptegende 100 myńnan asady.