Ankarada Ahmet Baıtursynulynyń 150 jyldyǵyna arnalǵan jıyn ótti
Sharany TÚRKSOI uıymymen, Ankara Hajy Baıram Velı atyndaǵy ýnıversıtetimen jáne Ankaradaǵy qazaq stýdentteri birlestigimen birlesip Qazaqstannyń Túrkııadaǵy Elshiligi uıymdastyrdy.
«Táýelsizdik – Qazaqstan halqy úshin eń qasterli qazyna jáne basty baılyǵy. Qazaqstan tarıhy talaı jarqyn kezeńderden turatynyn, sondaı jarqyn kezeńderdiń biri – ótken ǵasyrdyń basynda Alash týy astynda birikken zııalylar men qaıratkerlerimizdiń halqyn azattyqqa jetkizý jolynda júrgizgen kúresi», - dedi Qazaqstan Elshisi Erkebulan Sápıev «Ǵasyr ustazy - Ahmet Baıtursynuly» atty dóńgelek ústel otyrysynda.
Al Eýrazııa jazýshylar odaǵynyń tóraǵasy ıAkýp Ómeroǵlý XX ǵasyrdyń basynda Qazaqstandaǵy ult-azattyq qozǵalys basshylarynyń biri, qazaq tiliniń ǵalymy ári ádebıet qaıratkeri, «Alash orda» qozǵalysynyń múshesi Ahmet Baıtursynulynyń 150 jyldyq mereıtoıyna oraı Qazaqstan elshiliginde osyndaı jıynnyń uıymdastyrylǵanyna alǵys bildirdi. Ol sózinde Ahmet Baıtursynuly balalar úshin kóptegen eńbekter jazyp, onyń bastysy arab álipbıin qazaq tiline beıimdep, qazaq balalaryna arnalǵan tuńǵysh «Álippe» kitabyn 1912 jyly shyǵarǵanyn jáne bul kitap sol kezdegi qazaq halqynyń aǵartý isine qosqan erekshe úlesi ekenin atap ótti.
Hajy Baıram Velı atyndaǵy ýnıversıtettiń oqytýshy-zertteýshileri Gúljanat Qurmanǵalıeva-Erjılasýn men Hýlııa Kasapoǵlý Chengel ózderiniń baıandamalarynda Ahmet Baıtursynulynyń Qazaqstan tarıhynda erekshe orynǵa ıe ekenin, ol tek qazaq halqy úshin ǵana emes, búkil túrki álemine qajetti rýhanı jáne mádenı dúnıelerge sol kezde basa nazar aýdarǵan uly tulǵa ekenine keńinen toqtaldy. Onyń jazǵan óleńderi, eńbekteri, maqalalary, «Qazaq gazetin» basyp shyǵarýy, sondaı-aq «Alash» qaıratkerleriniń jazǵan eńbekteri túrki álemine qaldyrǵan murasy ekenine nazar aýdardy.
Hajy Baıram Velı atyndaǵy ýnıversıtetiniń doktoranty Eldos Toqtarbaı óziniń baıandamasynda ult ustazy A. Baıtursynulynyń basynan ótkergen qıynshylyqtary men jazǵan eńbekterine nazar aýdaryp, onyń eńbekteri áli de tereń zertteýdi talap etetinin atap ótti.
Atalǵan dóńgelek ústeldiń sońynda qatysýshylar A. Baıtursynulynyń sırek kezdesetin sýretterinen turatyn kórmeni úlken qyzyǵýshylyqpen qarady. Sondaı-aq, Ankarada joǵary oqý oryndarynda bilim alyp júrgen stýdentterdiń oryndaýynda qazaqtyń kúı men ánderi oryndaldy.