Ankara: QR Elshiligi túrik tiline aýdarylǵan kitaptardyń tusaýyn kesti
Konferentsııa aıasynda QR Prezıdenti Nursultan Nazarbaevtyń «Uly dala ulaǵaty» kitabynyń. M.Qasymbekov jazǵan «Elbasynyń ómirbaıany» shyǵarmasynyń, N.Ońjanovtyń «Bitimger - Sırııa sheshimi» eńbeginiń jáne Túrkııadaǵy Qazaqstannyń burynǵy Elshisi Janseıit Túımebaevtyń «Jańa kózqaras, jańa ólshem, jańa deńgeı» kitaptarynyń tusaýy kesildi.
Kitaptar Túrkııada basylyp shyqqan. Aıta keteıik, Ankaradaǵy alqaly jıynǵa Qazaqstannyń Tótenshe jáne Ókiletti Elshisi Abzal Saparbekuly, Túrkııanyń burynǵy prezıdenti Abdýlla Gúl, Prezıdent Rejep Taıyp Erdoǵannyń bas keńesshisi ıAlchyn Topchý, Uly Birlik partııasynyń tóraǵasy Mustafa Destıdjı, Túrkııa májilisindegi Qazaqstan-Túrkııa Dostyq tobynyń tóraǵasy, depýtat Halyk Ipek, Túrkııa májilisiniń burynǵy tóraǵasy Hıkmet Chetın, burynǵy Mádenıet mınıstri Namyk Kemal Zeıbek, Túrik keńesiniń burynǵy bas hatshysy Halıl Akyndjy qatysty.
Túrkııa prezıdenti Rejep Taıyp Erdoǵannyń bas keńesshisi ıAlchyn Topchý Prezıdent sálemin jetkize otyryp, eki eldiń mańyzdy rýhanı baılanystaryna toqtaldy.
«Túrkııa Prezıdenti Rejep Taıyp Erdoǵannyń atynan sizderdi quttyqtaı otyryp, bul qarym-qatynastar ary qaraı damı beretinine senim artamyn. Biz bir maqsatta kele jatqan baýyrlas, qandas elmiz. Túrkistanda jatqan Qoja Ahmet ıAsaýı - ortaq qundylyǵymyz. Bizdiń ata-babamyz - bir, tarıhymyz - bir, tilimiz - bir. Qazaqstan men Túrkııa eki myqty el retinde tanylady. Bul eki el Túrki áleminiń qaıta jandanýynyń kóshbasshysy boldy. Nazarbaev pen Erdoǵannyń kóregen saıasatynyń arqasynda biz eki el qarym-qatynasynyń eń jarqyn kezeńin basymyzdan ótkerip jatyrmyz. Balqan elderinen Qytaı qorǵanyna deıin sozylyp jatqan túrki áleminiń tili de, pikiri de bir bolaryna men senemin», - dedi ıAlchyn Topchý.
Eske sala keteıik, búgingi kúni Qazaqstan-Túrkııa dıplomatııalyq qarym-qatynastarynyń 25 jyldyǵyna oraı Qazaqstan jýrnalısteriniń Túrkııadaǵy baspasóz kúnderi ótip jatyr.
«Habar», «Almaty» telearnasy, «Egemen Qazaqstan», «Kazahstanskaıa pravda», «Aıqyn», «Jas Alash», «Túrkistan», «Qazaq radıosy», «QazAqparat» Halyqaralyq aqparat agenttiginiń tilshileri Ankara qalasyndaǵy saltanatty jıynǵa qatysýda. Baspasóz týry aıasynda qazaq jýrnalısteri Túrkııanyń Antalııa qalasyna baryp, Mádenıet jáne týrızm basqarmasynyń dırektory Ibragım Ajarmen kezdesedi. Antalııadaǵy kezdesýden soń, delegatsııa Gazıantep qalasyndaǵy Sırııa bosqyndary ornalasqan Izıp-2 lagerin kóredi. Túrkııadaǵy qazaq jýrnalısteriniń sapary 10 jeltoqsan kúni aıaqtalady.