Anglııaǵa jumysqa barǵan qazaqstandyqtar zańdy jıi buza bastaǵan: sottalǵandar bar

LONDON. QazAqparat – Anglııaǵa maýsymdyq jumysqa kelgen qazaqstandyqtar arasynda zań buzýshylyqtar kóbeıip ketti. Fermada jemis-jıdek jınaýdyń ornyna keıbir otandastarymyz qurylysta zańsyz jumys istep, tipti qylmysqa da barǵan. Aralarynda qyz zorlap, túrmege toǵytylǵan qazaqstandyq ta bar, dep habarlaıdy QazAqparat tilshisi.

Bul ferma Londonnan 200-ge jýyq shaqyrym jerde ornalasqan. Qulpynaı jáne tańqýraı ósirýmen aınalysady. Jumysshylary negizinen TMD memleketteriniń azamattary. Qazaqstannan kelgenderdiń sany 40-tan asady.

Erkebulan Kóshenov – Baıqońyr qalasy Tóretam kentiniń týmasy. Jasy otyzda. Bilimi joǵary, elde avtosalonda eńbek etken. Áıeli ekeýi qyzdaryn ata-ájesine tastap, alty aıǵa maýsymdyq jumysqa kelipti.

«Kelinshegimiz ekeýmiz el kóreıik, jer kóreıik dep keldik. Úı salyp jatqan soń, kishigirim nesıelerimiz bar. Sony jabaıyq dep maqsat qoıdyq. Áke-sheshemizge syılyq syılaǵymyz keledi», - deıdi Erkebulan.

Ulybrıtanııa Eýropalyq odaq quramynan shyqqannan keıin Rýmynııa jáne Bolgarııa sııaqty elderden burynǵydaı erkin kelip, eńbek etetinderge tosqaýyl qoıyldy. Jumys kúshine degen suranys edáýir artty. Al jergilikti halyqtyń tómen jalaqyǵa qara jumys istegisi joq. Sondyqtan bılik 2019 jyly pılottyq joba retinde arzan jumys kúshin TMD elderinen tarta bastady. Biraq zań talaptaryn qatań oryndaý mindetteldi.

«Qazaqstan bolsyn, basqa memleketterden bolsyn kelgen árbir azamattyń zańǵa baǵynǵany óte mańyzdy. Naqty bir fermaǵa ǵana baılanǵan jumys vızasy 6 aıǵa ǵana jaramdy. Odan keıin jumysshylar elge oralýy kerek», - deıdi ferma menedjeri Maksım Savchenko.

Biraq keıbir fermadaǵylar jumystaryn tastap, Londonǵa kelip, qurylysta, qonaq úılerde zańsyz eńbek etip júr. Ol azdaı qylmysqa baratyndary da kezdesedi. Basqalarmen eregisip, pyshaq ala júgiredi. Aralarynda, tipti, jasóspirim qyzdy zorlady jáne esirtki satty degen aıyppen jergilikti túrmede jazasyn ótep jatqan almatylyq jigit te bar. 8 jylǵa sottalyp, kinásin moıyndaǵandyqtan onyń jazasy 6 jylǵa qysqartylǵan. Mundaı jaǵdaılarda Qazaqstannyń Ulybrıtanııadaǵy elshiligi otandastarymyzǵa quqyqtyq qoldaý kórsetýge tyrysady, biraq zań talaptaryn oryndaý mindet ekendigin eskertedi.

«Osyǵan baılanysty keleshekte Ulybrıtanııaǵa maýsymdyq jumysshy retinde keletin otandastarymyzǵa jergilikti zańnama talaptaryn qatań saqtaý qajettigine nazar aýdaramyz», - deıdi Ulybrıtanııanyń Qazaqstandaǵy elshiliginiń konsýly Mereı Qýandyqov.

Statıstıka málimetterine sáıkes eki jyl buryn fermalarǵa 400-ge jýyq qazaqstandyq tartylsa, ótken jyly 2 700 adamǵa jýyqtaǵan. Aldaǵy ýaqytta olardyń sany artpasa, kemimeıtin túri bar.