Anglııada muǵalimder taǵy ereýilge shyqty

LONDON. QazAqparat - Anglııada ustazdar qaýymy taǵy ereýilge shyqty. Júzdegen myń pedagog jalaqylaryn ósirýdi jáne eńbek sharttaryn jaqsartýdy talap etýdi jalǵastyryp jatyr. 23 myńnan astam mektep jumysyn toqtatyp, oqýshylar sabaqqa barmady. Kóshege muǵalimder ǵana shyqqan joq. Narazylyqtaryn bildirgenderdiń qatarynda memlekettik qyzmetkerler, kishi dárigerler, ýnıversıtet oqytýshylary jáne metro júrgizýshileri de bar. Bul sońǵy on jylda bolmaǵan eńbek ujymdarynyń daýy, dep habarlaıdy QazAqparat tilshisi.

Ulttyq bilim odaǵy kásipodaq uıymyna múshe muǵalimderdiń buǵan deıin de bas kótergeni belgili. Pedagogtar jalaqyny ınflıatsııaǵa sáıkes kóbeıtýdi jáne eńbek jaǵdaılaryn jaqsartýdy suraǵan bolatyn. Biraq bıliktegiler olarǵa qulaq aspady. Qarjylyq zertteýler ınstıtýtynyń málimetinshe, ustazdardyń tabysy sońǵy 12 jyl ishinde orta eseppen 11 paıyzǵa azaıǵan.

«Menińshe, jalaqy kólemi muǵalimderdiń eńbegine tatymaıdy. Tipti, keıbir jumystarymyzdyń aqysy tólenbeıdi de. Mysaly, men senbi kúnderi sporttyq úıirme júrgizemin. Biraq oǵan aqsha almaımyn», deıdi muǵalimderdiń biri.

«Biz balalarǵa sapaly bilim berýimiz kerek. 30 baladan turatyn búkil synypqa bir muǵalim jetpeıdi. Biz qoldan kelgenniń bárin jasaımyz. Biraq oqýshylardyń qajettilikterin tolyq qanaǵattandyra almaımyz», deıdi taǵy bir ereýilge qatysýshy.

Pedagogtar kúnkóris deńgeıiniń kúrt tómendep ketkenin aıtady. Elde jaryq pen gaz qymbat, ıpotekalyq nesıelerdiń paıyzdyq mólsherlemeleri ósken, jaldamaly páterlerdiń aqysy aspandap tur. Kedeıshiliktiń qamytyn kıgen muǵalimder buǵan shydamaı, jappaı jumystan ketip jatyr. Ustazdardyń jetispeýshiligi bilim sapasyn tómendetip tastady.

«Biz úkimettiń mektepter men kolledjerge jáne sonda jumys isteıtin qyzmetkerlerge ınvestıtsııa quıýyn talap etemiz. Bizdiń balalarymyz jáne olardy oqytyp jatqan adamdar bar jaqsyǵa laıyq. Bizdiń mektepter barynsha qarjylandyrýdy qajet etedi. Úkimet bizge qulaq asýy kerek», - deıdi Ulttyq bilim odaǵy kásipodaq uıymynyń bas hatshysy Kevın Kortnı.

Kásipodaq uıymyndaǵylar laıyqty jalaqy usynylmaıynsha narazylyq sharalaryn toqtatpaımyz deıdi. Bıliktegiler bolsa, aılyq máselesin sheshý úshin kelissózder júrgizýge shaqyryp jatyr. Bilim mınıstri ereýilderdi doǵaryp, ortaq mámilege kelýge úndedi.

«Biz aldymen ınflıatsııany eki esege deıin azaıtýymyz kerek. Bul - óte mańyzdy másele.
Sol kezde ǵana eldegi barlyq adam onyń paıdasyn kóredi. Eger biz jalaqyny kóteretin bolsaq, qymbatshylyq deńgeıi odan saıyn arta túsedi», - deıdi Ulybrıtanııa bilim mınıstri Djıllıan Kıgan.

Budan bólek bul kúni 130 myńnan astam memlekettik qyzmetker, kishi dárigerler jáne ýnıversıtet oqytýshylary bas kóterdi. Metro júrgizýshileri de jalaqylaryn ósirýdi talap etip, kóshege shyqty. 24 saǵat boıy jerasty kólik qatynasy jumys istemeıdi, jolaýshylar dittegen jerlerine jete almaı álek.