Anglııada karantın talaptaryn buzǵandarǵa 10 myń fýntqa deıin aıyppul salynbaq

LONDON. QazAqparat –Osy apta basynan bastap Anglııada oqshaýlaý rejımin buzǵany úshin tólenetin aıyppul kólemi ósti. Bul aıyppul úıden tys jerde bolǵan nemese Covid-19 belgileri bar nemese naýqastardy baqylap otyratyn «Test and Trace» baǵdarlamasynyń qyzmetkerleri habarlasqannan keıin anyqtalatyn adamdarǵa qatysty, dep habarlaıdy QazAqparat VVS-ge silteme jasap.

Alǵash ret rejımdi buzýshylar 1000 fýnt (shamamen 1,3 myń dollar) tóleýge májbúr bolady. Karantındi ekinshi ret buzǵandar úshin 10 myń fýntqa deıin (13 myń AQSh dollary) aıyppul qarastyrylǵan.

Úkimet ózin-ózi oqshaýlaý rejımi taǵaıyndalǵan adamdardyń óte az paıyzy ony ustanatyndyǵyn kórsetken zertteý nátıjelerinen keıin aıyppuldy kóbeıtýdi sheshti. Brıtanııanyń Shotlandııa, Ýels jáne Soltústik Irlandııa sııaqty óńirleri de osyndaı sharalardy engizýdi josparlap otyr.

Brıtanııanyń NHS ulttyq densaýlyq saqtaý júıesiniń ókilderi úkimet bólek qurǵan Test and Trace baǵdarlamasyn synǵa aldy. Dárigerler Test and Trace aldaǵy qysta synaqtarǵa degen úlken suranysty eńsermeýi múmkin jáne qosymsha resýrstarǵa muqtaj dep alańdap otyr.

«Baǵdarlama el úshin órt pen qylmysqa qarsy kúres sııaqty mańyzdy, eger ol jumys istemese, bárimiz zardap shegemiz», dedi BBC-ge bergen suhbatynda NHS Providers uıymynyń basshysy Krıs Hopson.