Anglııa jerinde qazaq óneri saltanat qurǵan kesh ótti

LONDON. QazAqparat - Anglııanyń Somerset graftyǵyndaǵy Áýlıe Varfolomeı shirkeýinde qazaqstandyq «Qos Arna» dýetiniń kontserti bolyp ótti. Krýkern qalashyǵynda uıymdastyrylǵan keshke jergilikti halyq jınalyp, qazaq ónerimen sýsyndady. Aǵaıyndy Aıda jáne Azamat Jahanbekter qazaqtyń halyq ánderi men kúılerin oryndap, aǵylshyndarǵa ultymyzdyń baı mádenı murasyn usyndy, dep habarlaıdy QazAqparat tilshisi.

Jas ónerpazdardyń folklorlyq mýzykany nasıhattap júrgenderine bıyl 10 jyl. 5 jasynan bastap, aldymen qyl qobyz ben dombyrada oınasa, keıin basqa da ulttyq aspaptardy meńgerip, kórermenniń ystyq yqylasyna bólenip keledi. Brıtanııalyqtar bul kúni mýltıınstrýmentalısterdiń oryndaýyndaǵy Abaıdyń «Tor jorǵa» kúıin, «Aıttym sálem, Qalamqas» ánin, Nurǵısa Tilendıevtyń «Aqqý» kúıin jáne aǵylshyn tilindegi ándi tyńdaý múmkindigine ıe boldy.

«Shirkeýde biz birinshi ret kontsert berip turmyz. Bul ǵıbadathananyń 500 jyl buryn soǵylǵanyn bildik jáne onyń akýstıkasy óte keremet eken. Bizdiń balalardyń ár aspabynyń ereksheligi bar. Oryndaıtyn kúıleriniń, ánderiniń taqyrybyna baılanysty ár elge kórsetkimiz keledi», deıdi «Qos Arna» dýetiniń kórkemdik jetekshisi Roza Áripbaeva.

Bul kúni XIX ǵasyrdyń ortasynda qazaq dalasynda dúnıege kelgen Alataý Tamshybulaq Atkınsonnyń «Rojdestvo qońyraýlary» atty óleńine jazylǵan ánniń álemdik tusaýkeseri ótti. Alataý Tamshybulaq eýropalyqtardyń arasynda alǵashqylardyń biri bolyp, Qazaqstandy zerttegen belgili saıahatshylar Tomas jáne Lıýsı Atkınsondardyń uly. Ol Almaty oblysy Qapal aýylyndaǵy Tamshybulaq bulaǵynyń janynda týylǵandyqtan Alataý Tamshybulaq degen esimge ıe bolǵan. Keıin onyń Gavaııde tanymal memleket qaıratkeri jáne parlament múshesi bolǵany belgili.

«Óte jan jadyratarlyq dúnıe. Alataýdyń áni notaǵa túsirilip, shyǵarmaǵa jańa ómir syılandy. Nátıjesinde keremet kontserttiń kýási bolyp otyrmyz», deıdi Atkınsondardyń urpaǵy Peppa Smıt.

«Bir qyzyǵy qazaq mýzykasynyń bizde de bar, men biletin folklorlyq mýzykamen uqsastyǵyn baıqadym. Mysaly, ırlandııalyq aspaptardyń únimen úndes keletindigi tań qaldyrady. «Qos Arnanyń» búgingi án keshine óte rızamyz», deıdi Atkınsondardyń taǵy bir urpaǵy Stıv Braýn.

125 jyl buryn dúnıege kelgen óleńniń áýenin belgili brıtanııalyq kompozıtor ári pıanıst Maıkl Tsısanı-Ýılls jazǵan. Kameralyq mýzykadan bastap, hor jáne orkestrge arnalǵan shyǵarmalardy, sondaı-aq fılmderge partıtýralar jazýmen aıynalysatyn Maıkl úshin bul bitimi bólek jańa tájirıbe bolypty.

«Álbette, ánniń eń mańyzdy bóligi qazaq ónerimen tikeleı baılanysty. Aıda men Azamat meni ǵajaıyp dombyra jáne jetigen únimen tanystyrdy. Sóıtip men rojdestvolyq ánde sol aspaptardy paıdalanýǵa tyrystym. Nátıjesinde qazaq, gavaı jáne aǵylshyn mádenıetterin toǵystyrǵan shyǵarma dúnıege keldi», deıdi kompozıtor Maıkl Tsısanı-Ýılls.

«Men buǵan deıin eshqashan qazaq mýzykanttarynyń ónerin tamashalamappyn. Olar óte keremet aspaptarda oınady. Syrtqy pishinderi de erekshe. Bireýi, mysaly, túıeniń terisinen jasalǵan eken. Olardan shyqqan ún qaıǵyly, kóńildi bolady eken. Eń basty túsingenim, meniń bılegim kelip ketedi», deıdi «Áýlıe Varfolomeı shirkeýiniń dostary» uıymynyń tóraǵasy In Traıb.

Sharanyń ótýine Qazaqstannyń Ulybrıtanııadaǵy elshiligi qoldaý kórsetti. Kontsertten túsken qarajat qaıyrymdylyq maqsatynda bes ǵasyrlyq tarıhy bar shirkeýdi óz deńgeıinde ustap turý úshin jumsalmaq.