Anglııa mektepterinde uıaly telefondy paıdalanýǵa tyıym salyndy

<p>ANGLIıA. KAZINFORM - Jańa erejelerge sáıkes tártipke baǵynbaǵandardyń smartfondary tárkilenedi. Bilim mınıstriniń pikirinshe, oqýshylar endi sabaq kezinde gadjetterge alańdamaıdy jáne tártibi men minez-qulqy jaqsarady. Bul týraly Kazinform-nyń osy eldegi menshikti tilshisi Ǵalymjan Qaramanuly habarlady.</p>

Bilim mınıstrligi Anglııa mektepterinde uıaly telefon ustaýǵa tosqaýyl qoıdy. Biraq tyıymnyń zańnamalyq sıpaty joq. Dırektorlarǵa tek arnaıy nusqaýlyq jiberildi. Smartfonardy úıde qaldyrý nemese ýaqytsha bir jerge qoıa turý kerek ekenin mektepterdiń ózderi sheshedi.

- Men - qazaqpyn. Ata-anam Londonda ýaqytsha jumys istep jatyr. Biz mektepte osyndaı shúberek qaltaǵa telefonymyzdy salamyz. Ol qulyptanady. Tek qana apaıymyz sabaqtan keıin ashyp beredi, - deıdi Elızabet Garret Anderson atyndaǵy mekteptiń oqýshysy.

Onlaın platformalardy baqylaýmen aınalysatyn Ofcom kompanııasynyń málimetterinshe, 12 jasqa deıingi balalardyń 97 paıyzynda smartfon bar. Bul oqýshynyń oıyn bólip qana qoımaı, kıberbýllıngke ushyratyp, áleýmettik teńsizdik týǵyzýy múmkin. Bilim mınıstri mektep dırektorlarymen keńesip, máselege núkte qoıdy.

- Balalar mektepke oqýǵa, dostyq qarym-qatynas ornatýǵa barady. Adamdarmen aralasýdy úırenedi. Olar únemi uıaly telefonda otyrmaýy kerek. Habarlama jiberip, hat almasýdyń ornyna qatarlastarymen áńgimelessin, - deıdi Ulybrıtanııanyń Bilim mınıstri Djıllıan Kıgan.

Sondaı-aq zııandy kontenttiń balalarǵa qoljetimdi bolǵany kópshilikti alańdatady. Marqum Brıannanyń anasy Ester Djaı tehnologııalyq kompanııalardy jasóspirimderdiń áleýmettik jelilerge kirýine tyıym salýǵa shaqyrdy. Onyń qyzy kıberbýllıngtiń qurbany bolǵan. Saıabaqta qurdastary Brıannany pyshaqtap tastaǵan. Qylmyskerler asa qatygezdikpen adam óltirgeni úshin 20 jylǵa sottaldy. 

- Men tehnologııalyq kompanııalardy óskeleń urpaqtyń jaǵdaıyn oılap, bolashaǵyna asa jaýapkershilikpen qaraýǵa shaqyrar edim. Olardan 16 jasqa tolmaǵan balalarǵa áleýmettik jelilerge kirýge tosqaýyl qoıatyn uıaly telefondar shyǵarýdy suraımyn. Meniń qyzymdy o dúnıelik etkender qylmysqa barmas buryn zorlyq-zombylyq jasaýdy dál sol jerde úırengen, - deıdi qaıtys bolǵan jasóspirimniń anasy Ester Djaı.

13 betten turatyn nusqaýlyqta mektep muǵalimderine de smartfon ustaýǵa tosqaýyl qoıylǵan. Eger jumysyna asa qajet bolmasa paıdalanbaıdy. Ata-analar oqýshylarmen tikeleı telefon arqyly emes, mektep keńsesi arqyly baılanysýy kerek. Qoǵam belsendileri bul bastamanyń bereri az dep esepteıdi. 

- Balalar telefondy kóbine mektepten tys ýaqytta paıdalanady. Kóptegen oqý orynynda smartfondarǵa tosqaýyl burynnan qoıylǵan. Bilim berý salasyndaǵy basqa máselelermen bas qatyrý kerek, - deıdi Mektep jáne kolledj basshylary qaýymdastyǵynyń bas hatshysy Djeff Barton.

Ulybrıtanııada smartfonǵa oqýdan tys ýaqytta da tolyq tyıym salynǵan mektepter bar. Muǵalimderdiń, ata-analardyń jáne oqýshylardyń aıtýynsha, bul óte tıimdi ádis. Kóbine telefon qaýipsizdiktiń kepili bola bermeıdi, kerisinshe, ınternettegi zııandy kontentke jol ashyp, áleýmettik teńsizdikke alyp keletinin aıtady sarapshylar.