Anglııa karantındik sharalardy alyp tastamaq – sarapshylar eskertý jasady

NUR-SULTAN. QazAqparat – Brıtanııa antıvırýstyq sharalardy tolyǵymen alyp tastamaq. Bul týraly QazAqparat BBC-ge silteme jasap habarlaıdy.

Pandemııanyń basynan beri ǵalamshardaǵy koronavırýs juqtyrǵandardyń sany 187 mln adamǵa jetti. Osy ýaqyt aralyǵynda vırýstan 4 mln-nan asa adam kóz jumdy. Búgingi kúni álem boıynsha 3,4 mlrd adam vaktsına alǵan.

19 shildeden bastap Anglııada antıvırýstyq sharalardyń barlyǵyna jýyǵyn alyp tastamaq. Brıtandyq sarapshylar bul sheshimniń juqtyrý jaǵdaılarynyń jáne aýrýhanaǵa túsetin naýqastardyń kóbeıýine ákelýi múmkin ekenin eskertedi.

«Ahýal búgingiden nashar bolatyny anyq, eń nashar ahýaldyń qandaı bolatynan túsinbeı otyrmyz», - deıdi Lafboro Ýnıversıtetiniń derekterdi taldaý boıynsha sarapshysy Dankan Robertson.

«Bul ıadrolyq reaktordan basqaratyn tetikterdi alyp tastaýmen teń», - deıdi Robertson.

Brıtandyq dárigerler qaýymdastyǵy keńesiniń tóraǵasy Chaand Nagpol Anglııanyń áli de mańyzdy bóliginiń ekpe almaǵanyn eske salyp, shekteýlerdi alyp tastaýdyń jaǵdaıdyń ýshyǵýyna ákelip, densaýlyq saqtaý júıesine edáýir salmaq túsirýi múmkin ekenin eskertedi.

Eske salsaq, buǵan deıin Brıtanııa premer-mınıstri Borıs Djonson 19 shildeden bastap koronavırýsqa qatysty shekteýlerdiń alynatyndyǵyn aıtqan edi.