Angelına Lýkas: Dóreki jigittiń tisin qaǵyp alǵan kezim boldy
- Angelına, WBC sanaty boıynsha alǵan tıtýlyńyz qutty bolsyn! Endi qandaı josparyńyz bar?
- Tamyz aıynda Álem chempıony ataǵy úshin úlken jekpe-jek ótkizemin. Bul kásipqoı bokstaǵy besinshi jekpe-jegim, tórtinshi tıtýldyq aıqasym bolady. Kásipqoı boks álemindegi uıymdarǵa maǵan senim artqany úshin alǵysym kóp. Mamyr aıynda WBC International tıtýlyna qol jetkizdim. Mundaı tıtýl otandasymyz, Olımpıada chempıony Vasılıı Jırovta bolǵan edi. Áıgili Mennı Pakıaonyń da osyndaı tıtýly bolǵan. Men de solardyń izin jalǵap, áıelder boksynda álemdik deńgeıdegi juldyz bolyp, Qazaqstannyń atyn shyǵarǵym keledi.
- Jaqyn arada qandaı boksshylarǵa qarsylas atanǵyńyz keledi?
- 52 keliden 54 kelige deıingi salmaq dárejesindegi birinshi nómirli boksshylarmen judyryqtasqym keledi. Kez kelgenimen shyǵýǵa daıynmyn. Maǵan myqty qarsylastar bolǵany kerek. Ondaı boksshylar menimen judyryqtasýǵa daıyn ba, másele sonda. Óıtkeni buǵan deıin birnesheýi bas tartty. Álem chempıony atanyp júrgen qyzdardyń kóbi Meksıkadan shyqqan. Tarıhqa óz atyńdy jazý úshin kil myqtylarmen shyǵý kerek.
- Otandastaryńyzdyń kóbi sizdi eń kórikti sportshy dep baǵalaıdy. Mundaı nazar sizdiń boksqa degen ynta-yqylasyńyzǵa kedergi keltirmeı me?
- Jyly sózińizge rahmet. Meniń oıymsha, kez kelgen qyz balasy sporttyń qandaı túrimen shuǵyldansa da, qyzǵa tán qylyǵyn joǵaltpaýy kerek. Bul - bizdiń tabıǵatymyz, qudaı bizdi názik etip jaratqan. Rıngte men sońyna deıin aıqasatyn jaýyngerge aınalam. Al ómirde názikpin. Boks – meniń jumysym ári ómirlik isim. Sondyqtan rıngte bárin minsiz istegim keledi. Biraq qarsylastaryma jamandyq tilemeımin. Men úshin eń bastysy - úıime aman-esen oralý. Ol úshin óte kóp daıyndalyp, qorǵanysymdy bekemdeı túsý kerek. Mysaly, Ana Arasolamen ótken aıqas 10 raýndtyq boldy. Osy 10 raýndqa shydaý úshin jattyǵý kezinde 20-24 raýndtyq sparıngterge shyqtym. Sondyqtan 10 raýndty qınalmaı eńsergendeı boldym. Arasola sporttyq mansabynda 48 jekpe-jek ótkizgen. Oǵan 10 raýndtyq aıqas degen úırenshikti dúnıe boldy. Meniń qalaı shydap shyqqanymdy bilseńiz ǵoı. Jattyǵýlarda, sparıngterde júktemeni asyryp jumys istedim. Arasola meniń alǵash ret 10 raýndtyq aıqasqa shyǵyp, ony ońaı eńsergenime tańǵaldy. Aıqastan keıin ózi solaı dedi.
Al kelbetim sporttaǵy mansabyma keri áser etip jatqan joq. Klýbtarda qydyryp, ishimdik ishpeımin. Salaýatty ómir saltyn ustanam. Kelbetimniń bylaıǵy ómirde kómegi bar. Instagram-ǵa ádemi sýretter salýǵa tyrysam. Sol arqyly aýdıtorııamdy qýantqym keledi. Ómirde kóbine sporttyq kıimmen júrem. Óıtkeni ýaqytymnyń kóbi jattyǵýmen baılanysty. Biz qazir kóptegen álemdik brendtermen kelissóz júrgizip jatyrmyz. Meni ózderiniń betkeustar tulǵasy retinde kórgisi keletin kompanııalar bar. Olar meni kúsh pen kelbetti bir boıyna toǵystyra bilgen adam retinde jarnamalaǵysy keledi. Sondyqtan kelbetim kedergi emes. Bastysy qudaı bergen kórikti orynmen paıdalana bilý kerek shyǵar.
- Buǵan deıingi suhbattardyń birinde boksqa alǵash ájeńiz jetelep ákelgenin aıtyp edińiz. Boks sııaqty qara kúsh pen tegeýrindi minez qajet ete tin sportty tańdaýyńyzǵa ne sebep boldy?
- Bala kezimnen tynymsyz edim, kúsh-qaıratym tasyp turatyn. Ájem de qaıratty adam. Sondyqtan meniń eshkimge des bermeıtinime sense kerek. Óte kishkentaı kúnimde bıge, júzýge baryp júrdim. Tym belsendi edim. Sóıtip júrip boksqa áýestigim oıandy. Alǵashqy soqqylardy ákemnen úırendim. Ol - qoıan-qoltyq urystan nusqaýshy. Ákemniń kórsetken ádisteri qatty unap qaldy. Osydan bastap áke-shesheme boksqa aparyńdar dep aıta bastadym. Biraq olar quptamady. Sóıtip júrgende ájem qonaqqa keldi. Oǵan aıtyp edim, «shyn qalasań, barasyń» dep short kesti. Alǵashqy qolǵabym men shlemimdi sol kisi satyp áperdi. Ár tań saıyn avtobýspen baratynmyn. Jolda ájem kútip alyp, zalǵa ózi aparatyn. Ómirim osylaısha basqa arnaǵa buryldy. Eseıe kele áıgili boksshylardyń jekpe-jekterin tamashalaıtyndy shyǵardym, fılmder kórdim. Múhamed Álı, Maık Taıson, Mennı Pakıao sııaqty boksshylardyń ómir tarıhymen tanystym. Mennı Pakıaonyń WBC International tıtýlyn utqan jekpe-jegin bala kezimde teledıdardan kórgen edim. Endi sol tıtýldy ózim de aldym. Qyzyq emes pe?! Tarazdan shyqqan qarshadaı qyz bul jolda talaı qıyndyqtan, talaı adamnyń keri pikirinen ótti. Meniń bokstan ketýime áreket jasaǵandar kóp boldy. Biraq men synǵan joqpyn. Іzimdegi ini-sińlilerim meniń sporttaǵy jolymdy kórip, múmkin emes dúnıe joq ekenin túsinse deımin. Qıyndyqqa moıymaı armanǵa sený kerektigin bilse deımin. Boks týra ómirdiń ózi sııaqty. Qalaǵanyńa qol jetkizgiń kelse, urystan qashpaýyń kerek. Boks meniń minezimdi shyńdady. Rıngte kórgen qıyndyqtarymmen salystyrǵanda ómirdegi ózge qıyndyqtar túk emes bolyp qalady eken. Bokstyń arqasynda jaýapty bolyp, tártipke úırendim. Óıtkeni jattyǵýdy jiberip alsań, rıngte mańdaıyńa soqqy bolyp qaıtady.
- Oqyrman qaýymǵa sizdiń jek e ómirdegi statýsyńyz qyzyq bolýy múmkin. Qupııa bolmasa, sol jaǵyna toqtala ketseńiz…
- Qazir basym bos. Árıne kóz salyp, sóz salyp júrgen erler bar. Biraq solardyń bári meni birden jar etkisi keledi. ıAǵnı, bokstan qol úzgenimdi qalaıdy. Al men jarymnyń meni qoldap, súıikti isime tosqaýyl qoımaıtyn adam bolǵanyn qalaımyn. Olardyń nege meni birden jar etkisi keletinin túsinbeımin. Áýeli jaqyn tanysyp, qyr-syrymyzdy bilisip baryp, sodan keıin ǵana neke sııaqty salmaqty baılanys týraly oılana bastaýǵa bolady ǵoı. Men udaıy damyp, jańa dúnıelerdi meńgergendi unatamyn. Sondyqtan serigim aqyldy, adal adam bolsa deımin. Árıne, kórki de mańyzdy.
- Sizdi áleýmettik jelide synaıtyndar kóp pe? Jaǵymsyz pikir jazǵyshtardyń sózi kóńilińizge qatty tımeı me?
- Qazir heıterlerge qarsy ımmýnıtetim bar. Buryn jaǵymsyz pikirler bolsa, óshirip tastaıtynmyn. Qazir óıtpeımin. Adamnyń basqa bireýge nege jaǵymsyz pikir jazatynyn túsingendeımin. Іshki áleminde ádildigi az adamdar sondaı sózge qumar keledi. Óziniń ómiri mánsiz bolǵandyqtan ózgeniń ómirine tórelik aıtyp otyrady.
- Bokstaǵy qabiletińizdi bylaıǵy ómirde qoldanǵan kezińiz boldy ma?
- Iá, bir ret sondaı jaǵdaı boldy. Bir jerde keshki as iship otyrǵanmyn. Tanymaıtyn jigit kelip mazamdy aldy. Árıne, onyń betin qaıtaryp tastadym. Sol isim unamaı qalsa kerek, janyma otyryp alyp, aıǵaılaı bastady. Bir kezde oń qolyn siltep qalǵandaı boldy. Men onyń qoly sermelgen kezde avtomatty túrde qarymta soqqy jasap úlgerdim. Sóıtip oılamaǵan jerden onyń ernin jyryp, tisin qaǵyp tastadym. Aqyry álgi jigitti jubatyp álek bolǵanym bar. Tipti tis dárigerine deıin jetkizip saldym. Keterimde qyzdy qaratý úshin tik sóılemeı, tilin taba bilý kerektigin aıttym. Qyzdarǵa aıtarym, óz namystaryńdy qorǵaı bilińder. Ómirde bári bolýy múmkin. Sol oqıǵadan keıin qolǵapsyz soqqymnyń aýyr ekenin shyn máninde uqtym. Endi rıngten tys jerde judyryq silteýime týra kelmese eken dep tileımin.
- Suhbat bergenińizge rahmet!