Andreı Lýkın kontrabandalyq jolmen keletin qarýǵa qylmystyq jaýapkershilik engizýdi usyndy

NUR-SULTAN. QazAqparat - Senator Andreı Lýkın elimizdegi qarý-jaraqtyń zańsyz aınalymyna jazany kúsheıtýdi usynyp otyr. Ol búgin Senattyń jalpy otyrysy barysynda Úkimet basshysy Álıhan Smaıylovtyń atyna tıisti depýtattyq saýal joldady, dep habarlaıdy QazAqparat tilshisi.

Senatordyń málimetinshe, 2019-2021 jyldar aralyǵynda elimizde 545 myńnan astam qylmystyq quqyq buzýshylyq tirkelgen, onyń ishinde 600 jaǵdaıda atys qarýy qoldanylǵan, onyń 88%-y zańsyz aınalymda bolǵan. Al qarýdy saqtaý jáne ony tirkeý sharttaryn buzǵany úshin 45 myńnan astam adam ákimshilik jaýapkershilikke tartyldy.

«Qazirgi ýaqytta atys qarýyna uqsas, gazdy, gazdy-travmatıkalyq, sıgnaldyq jáne pnevmatıkalyq qarý túrlerinen oq atatyn qarýdy zańsyz jasaý faktileriniń kúrt ósý úrdisi baıqalady. Qylmystyq ortanyń músheleri men búldirgi dinı aǵymdy jaqtaýshylar mundaı qarýdy soǵys qarýyna aınaldyrýmen aınalysady. Qarýdyń bul túriniń taralý úrdisi ulttyq qaýipsizdik múddelerine eleýli qaýip tóndirip otyr», - dedi senator Andreı Lýkın.

Andreı Lýkın atys qarýynyń aınalymyna baılanysty qylmystardyń aldyn alý jáne olarǵa qarsy turý maqsatynda travmatıkalyq, pnevmatıkalyq, ańshylyq qarýlar men olardyń negizgi bólikterin kontrabandalyq jolmen ákelgenderge, tegis uńǵyly tirkelmegen qarýdyń zańsyz aınalymyna qylmystyq jaýapkershilik engizýdi usyndy.

Senator sonymen qatar qarý-jaraqty satatyn úı-jaılardy tehnıkalyq kúsheıtý talaptaryn qatańdatý qajet dep sanaıdy.