Andreı Chebotarev saıası partııalardyń saılaý naýqanyndaǵy belsendiligine qatysty pikir bildirdi

NUR-SULTAN. QazAqparat – «Alternatıva» ózekti zertteýler ortalyǵynyń dırektory Andreı Chebotarev saılaý protsesine qatysyp jatqan saıası partııalardyń belsendiligine qatysty pikir bildirdi, dep habarlaıdy QazAqparat tilshisi.

«Parlamenttik jáne jergilikti saılaýlarǵa elimizde resmı tirkelgen 6 saıası partııanyń 5-eýi qatysyp jatqany belgili. Jalǵyz oppozıtsııalyq partııa – Jalpyulttyq sotsıal-demokratııalyq partııa saılaýǵa qatysýdan bas tartty. Osyǵan baılanysty sarapshylyq jáne medıa ortada «saılaýǵa oppozıtsııa qatyspasa, demek onda báseke, tipti zańdy bolmaıdy» degen pikirtalas júrip jatyr. Bul oraıda pikirtalastyrýǵa da bolady. Óıtkeni, ótken jyly «Qazaqstan-2050» demokratııalyq kúshter koalıtsııasy taratyldy. Bul koalıtsııa «Nur Otan» partııasy janynda jumys istedi jáne oǵan búginde saılaýǵa qatysyp jatqan barlyq saıası partııalar kirdi. Mundaı koalıtsııanyń saılaýǵa deıin óz jumysyn toqtatýy da atalǵan partııalardy áleýettik seriktester, saıası odaqtastar retinde baılanystyrmaıtyndyǵyn bildiredi. Árkim ózi úshin kúresedi», - dedi ol Qazaqstandaǵy saılaýǵa qatysty uıymdastyrylǵan dóńgelek ústel barysynda.

Onyń atap ótýinshe, saıası partııalar parlamenttik, sonymen qatar máslıhattar saılaýyna da belsendi qatysyp jatyr.

«Nur Otan» partııasy kóshbasshysy Elbasy Nursultan Nazarbaev belgilep bergen óziniń baǵarlamalyq baǵytynan taımaı kele jatqanyn kórip otyrmyz. Parlamenttik «Aq jol» men «Qazaqstannyń halyq partııasy» jáne parlamenttik emes «Adal» men «Aýyl» partııalary da belsendi. «Adal» partııasy kóptegen baıqaýshylardy tań qaldyryp, saılaý protsesinde alǵa umtylyp shyqty. Buryn «Birlik» partııasy bolǵan kezinde eshqandaı qyzmetin júrgizbegen, naqty kózqarasyn bildirmegen edi. Tek 2016 jylǵy parlamenttik saılaýǵa qatysqany bolmasa», - dedi sarapshy.

Andreı Chebotarovtyń aıtýynsha, «Aq jol», «Qazaqstannyń halyq partııasy» jáne «Aýyl» partııasy saılaý aldy úgit jumystaryn qarqyndy júrgizýde.