Andres Rodrıges-Pose: Astana halyqaralyq forýmy - álemge bereri mol jıyn

ASTANA. QazAqparat - 7-8 maýsym kúnderi Astana halyqaralyq forýmy ótedi. Oǵan 300-den astam álemge tanymal spıker qatysady. Alqaly jıyn qonaqtary qatarynda brıtanııalyq ozyq oqý oryndarynyń professorlary da bar, dep habarlaıdy QazAqparat tilshisi.

Andres Rodrıges-Pose - álemge áıgili London ekonomıka jáne saıasattaný mektebi ýnıversıtetiniń professory, ekonomıkalyq geografııanyń bilgir mamany.

Ol óńirlerdiń damýy taqyrybyn uzaq jyldar boıy zerttep keledi.

Ǵalym akademııalyq ortada zor qurmetke ıe. Saıasatkerler mańyzdy sheshim qabyldaǵanda da onyń eńbekterine jıi súıenedi.

«Álemdegi geosaıası jaǵdaı kúrdeli, ekonomıkalyq shıelenister maza bermeı tur, pandemııa saldary alańdatady. Astana halyqaralyq forýmy sol máselerdiń sheshimin taýyp, ekonomıkalyq damýǵa jol silteıdi dep úmittenemin. Tek Qazaqstan úshin emes, álemge bereri mol jıyn bolady dep oılaımyn», - deıdi professor.

Professor forýmda ózi mashyqtanǵan birqatar másele boıynsha baıandama jasamaq.

Ásirese, ekonomıkalyq belsendiligi tómen óńirlerdi qoldaý, aımaqtyq teńsizdikti joıý taqyrybyna basa nazar aýdarady.

Problema qazir sheshimin tappasa, aýyr zardaptarǵa ákelýi múmkin deıdi ǵalym.

«Ekonomıkalyq damý kórsetkishteri Astana men Almatyda joǵary bolýy zańdy qubylys. Biraq basqa óńirler de, ásirese ońtústiktegi, kóshten qalyp qoımaýy kerek. Halyqty jumyspen qamtý deńgeıi jáne eńbek ónimdiligi joǵary bolǵanda ǵana memleket kórkeıedi», deıdi Andres Rodrıges-Pose.

Rodrıges-Pose qazaqstandyqtardyń ál-aýqatynyń kartasyn jasaýmen de aınalysqan.

Halyq qaı oblysta ózin qaýipsiz ári qolaıly sezinetinin, ómirge qanshalyqty qanaǵattanyn zerttegen.

Astana forýmynda bul zertteýdiń nátıjesi jarııa etiledi degen jospar bar.