Andrade Jánibek Álimhanulymen aıqastan bas tartsa, chempıondyq tıtýlynan aıyrylýy múmkin

NUR-SULTAN. QazAqparat – WBO nusqasy boıynsha álem chempıony Demetrıýs Andrade qazaqstandyq Jánibek Álimhanulymen aıqasqa shyǵýdan bas tartsa, Dúnıejúzilik boks uıymynyń tarapynan sanktsııa salynýy múmkin, dep habarlaıdy QazAqparat Sports.kz saıtyna silteme jasap.

Búgin WBO ekeýiniń jekpe-jegin 15 qańtar kúni Pýerto-Rıkodaǵy uıymnyń bas keńsesinde ótetin promoýterlik saýdaǵa shyǵardy. Buǵan deıin eki jaqqa kelissóz júrgizýge 20 kún berilgen edi.

Badlefthook.com saıtynyń habarlaýynsha, Andrade Álimhanulymen aıqasýdan bas tartsa, WBO boksshyny tıtýlynan aıyryp, ony bos dep jarııalaýy nemese Demetrıýstyń qatysýynsyz «ýaqytsha» tıtýlǵa jekpe-jek jarııalaýy múmkin.

Budan buryn amerıkalyqtyń promoýteri Eddı Hırn qaraýyndaǵy boksshyǵa WBC tıtýlynyń ıegeri Djermall Charlomen biriktirýshi aıqas ótkizgisi keletini týraly málimdegen.