Anasyn sotqa bergen jigit - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 27 qarasha, beısenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

Qandasymyz Serik Sultanǵabıevke «Reseıdiń qaharmany» ataǵy berildi, - dep jazady «Egemen Qazaqstan» gazeti búgingi sanyndaǵy « Erlikke laıyq eren baǵa» atty maqalasynda.

Basylymnyń atap ótýinshe, qyrkúıek aıynyń aıaq kezinde Sverdlov oblysyndaǵy Lesnoı qala­synda ornalasqan №3275 áskerı bólimshede apatty jaǵdaı oryn alǵan bolatyn. Jattyǵý kezinde kishi serjant granatany abaısyzda qolynan túsirip alady. Komandır Serik Sultanǵabıev serjantty ıterip jiberip, granatany óz denesimen basyp jata qalady. Jarylǵan granata jaryqshaqtarynan komandır aýyr jaraqat aldy. Birneshe operatsııany bastan keshti. Ol apattan qutqaryp qalǵan kishi serjantqa eshqandaı zaqym kelgen joq, aman qaldy. Jarylys jaraqaty aýyr boldy. Mine, eki aı boıy áli de qulan-taza aıyǵyp kete almaı jatyr. Aldymen Lesnoı qalasynda, odan beti beri qaraǵan soń Ekaterınbýrgtegi aýrýhanada em­deldi. Osydan bir aı buryn jaraqat zardabynyń beti qaıtyp, ol tasymalǵa jaraıtyn bolǵan soń, Máskeýdegi Reseı ishki ister mınıstrliginiń áskerı klınıkalyq gospıtaline aýystyryldy.

Qaharmandy quttyqtaý úshin gospıtalge Reseı ishki ister áskerleri bas shtabynyń basshysy Vıktor Zolotov, Oral aımaqtyq ishki ister komandovanıesi áskerleriniń qolbasshysy Aleksandr Porıadın jáne Lesnoı soldat analary komıtetiniń tóraıymy Nellı Markelova kelipti. Sverdlov oblysynyń adam quqyqtaryn qorǵaý jónindegi ýákiletti ókili Tatıana Merzlıakova da arnaıy Máskeýge baryp, ofıtserdi týǵan kúnimen jáne joǵary memlekettik nagrada alýymen quttyqtap, oblys gýbernatory Evgenıı Kýıvashevtiń sálemi men syılyǵyn jetkizgen.

***

«Aıqyn» gazetiniń búgingi sanynda «Anasyn sotqa bergen jigit» degen taqyryppen maqala basylyp otyr.

Basylymnyń jazýynsha, Serik Jaqsylyquly Ken­je­bekov 29 qyrkúıek 1991 jyly dúnıege kel­gen. Anasy Perızat Jaq­sy­lyq­qyzy Kenjebekovanyń týǵan jyly -1975. Bosanǵannan keıin bes kúndik náresteni per­zent­ha­na­ǵa tastap ketken Perızat ol kez­de nebári 16 jasta eken. Ana ma­habbaty buıyrmaǵan Serik taǵ­dyryn tálkekke salǵan sheshesin sot­qa berip, ómirin óksitkeni úshin ótemaqysyna (moralnyı ýşerb) 5 mıllıon talap etipti.

Bul qadamǵa barmas buryn ol anasyn qanshama ret izdegen. «Barmysyń baýyrym» habaryna da shyqqan. Alaıda anasy ony izdep kelmepti. Osynyń bárine qatty nalyǵan bala óz anasyn sotqa bergen eken.

«Úlkender aıtady «Jumaq - ana­nyń tabany astynda» dep, al týǵan balasyn kereksiz zat sekildi tastap ketken jannyń ta­ba­nynyń astynda qaıdaǵy ju­maq? Ony elestetýdiń ózi kúlkili», deıdi ashynǵan bala.

***

Álem boıynsha árbir úshinshi áıel urý, jynystyq qatynasqa kúshteý sııaqty zorlyqtardyń qurbany bolady eken. Máselen, DDU málimeti boıynsha, 2013 jyly dúnıejúzindegi áıelderdiń 35 paıyzy kúsh kórsetý, jynystyq zorlyq kórgen, dep jazady «Aıqyn» gazeti « Árbir segizinshi áıel zorlyq kóredi» atty maqalasynda.

Sondyqtan 25 qarashada áıelderge jasalatyn zorlyqty joıýǵa arnalǵan halyqaralyq kúres kúninde búkil álem boıynsha genderlik zorlyq-zombylyqqa qarsy jyl saıynǵy 16 kúndik naýqany bastalady. Maqsat - áıelder men balalar jıi qorlyq kóretin zorlyq-zombylyq máselesine qoǵamnyń nazaryn aýdarý. Óıtkeni quqyq buzýshylyqtardyń kez kelgeni adam boıynda psıhologııalyq jaraqat qaldyryp, jalpy, áıel men qyzdardyń densaýlyǵyna, sonymen qatar reprodýktıvti densaýlyǵyna zalal keltirýi múmkin.

QR Bas prokýratýrasy ja­nyndaǵy quqyqtyq statıstıka málimeti boıynsha, áıelderge kórsetiletin zorlyqtyń sa­ny artýda. 2013 jyly jasal­ǵan qylmystyq isterdiń 359 myńynyń 137-si - áıel­derge qatysty jasalǵan qyl­mystar. Búginde ózine-ózi qol jumsaýǵa ıtermeleý 4 esege artqan. Urlap áketý - 2 esege, kámeletke jetpegenderdi jezók­shelikpen aınalysýǵa kúshteý - 30,7 paıyzǵa, kámelet jasqa tolmaǵandarǵa jynystyq qa­tynas turǵysynda zorlyq kór­setý - 2 ese, sondaı-aq olardy saýdaǵa salý 7 ese kóbeıgen.

***

«Vremıa» gazetiniń «Delo bylo v Tehase...» atty maqalasynda Ońtústik Qazaqstan oblysynda tutanǵan jer daýy týraly jazylǵan.

Basylymnyń atap ótýinshe, Oblystyq jer kadarstry ǵylymı-zertteý ortalyǵynyń birqatar laýazymdy qyzmetkerleri jemqorlyqqa aıyptalyp otyr. Olardyń qıturqy áreketteriniń kesirinen aınalasy bir saǵattyń ishinde 90 jergilikti turǵyn ózderine tıesili jer telimderinen aıyrylyp, «Qurylys Stroı Market» qurylys kompanııasy áp-sátte 220 gektar jerge «úlkeıip» shyǵa kelgen. Qatardaǵy jer ıelerine keltirilgen zalal júzdegen myń dollarǵa baǵalanyp otyr.