Anar Jaıylǵanova: Memlekettik qyzmetshiler barynsha úılesimdi jumys isteýi kerek

NUR-SULTAN. QazAqparat - Mmlekettik qyzmetshiler barynsha úılesimdi jumys isteýi kerek. Bul týraly QR Memlekettik qyzmet isteri agenttiginiń tóraıymy Anar Jaıylǵanova aıtty, dep habarlaıdy QazAqparat tilshisi.

«Dúnıejúzilik densaýlyq saqtaý uıymynyń jańa koronavıýrs pandemııasyn jarııalaýyna jáne QR Prezıdenti Qasym-Jomart Toqaevtyń tótenshe jaǵdaı engizýine baılanysty memlekettik apparatqa halyq tynys-tirshiliginiń barlyq salasynyń úzdiksiz jumysyn qamtamasyz etý boıynsha úlken jaýapkershilik júktelgen. Búgin biz jańa talaptar jaǵdaıynda barynsha birlese otyryp, aldyn ala áreket etýimiz qajet. Buǵan bizdi Memleket basshysy shaqyrýda. Bul kúnderi azamattarymyzdyń halyqqa qyzmet kórsetý ortalyqtary men memlekettik mekemelerge júginbeı qajetti kórsetiletin qyzmetter kólemin alýyn qamtamasyz etý úshin memlekettik qyzmetshiler barynsha úılesimdi jumys isteýi kerek», - dedi agenttik basshysy.

Onyń atap ótýinshe, qazirgi ýaqytta qyzmetterdi elektrondy formatqa kóshirý boıynsha memlekettik organdardyń belsendi qyzmetiniń arqasynda azamattar úıden shyqpaı-aq elektrondy túrde 80 paıyzdan astam memlekettik qyzmetti alýǵa múmkindigi bar.

«Bul rette azamattardyń memlekettik qyzmetterdi qashyqtan alýy, sonyń ishinde ótinishterdi memlekettik organdardyń Call-ortalyqtary jáne oınlaın arqyly qabyldaý úshin aqparattyq júıeler men portaldardyń úzdiksiz jumys isteýine erekshe nazar aýdarý qajet», - dedi Anar Jaıylǵanova.