Anar Maqasheva ýtılalym mólsherlemesiniń tómendeıtindigine oraı pikir bildirdi

NUR-SULTAN. QazAqparat – Qazaqstan avtobıznes qaýymdastyǵynyń vıtse-prezıdenti Anar Maqasheva kádege jaratý alymy mólsherlemesiniń 50 paıyzǵa tómendetiletindigine qatysty pikir bildirdi, dep habarlaıdy QazAqparat tilshisi.

«Qaýymdastyq quramyna resmı óndirýshilermen qatar kólik quralyn ımporttaýshylar da kiredi. Óndirýshiler úshin ahýal esh ózgermeıdi. Óıtkeni, kólik quramynyń qunyna kádege jaratý alymy qosylmaǵan. Óndirýshilerimiz de zańnamaǵa saı kádege jaratý alymyn tóleýge kelisedi. Olar da kádege jaratý alymyn tóleýshiler sanalady. Odan keıin kádege jaratý alymy qarajatyn jınaýmen aınalysatyn operator dál sol somany sońǵy tutynýshyǵa ýtılalym tólemi qosylmaýy úshin qaıtaryp beredi», - dep atap ótedi qaýymdastyq ókili.

Sonymen qatar, Anar Maqasheva ýtıl alymynan túsken qarajattyń jeńildikpen, jyldyq 4 paıyz mólsherlememen jeńildetilgen nesıe berý baǵdarlamasyna jumsalatyndyǵyna toqtalyp, munyń oryndy sheshim ekenin atap ótti.

« Óıtkeni, Qazaqstan naryǵyndaǵy jańa kólik satyp alýǵa qatysty ortasha mólsherleme shamamen 17-25, tipti keıbir kompanııalarda 40 paıyzǵa deıin jetedi. Al jyldyq 4 paıyzdyq mólsherleme - jańǵa kólik satyp alý úshin qoljetimdi qarjylyq baǵdarlama. Bul tipti bólip tóleýden de áldeqaıda jaqsy»,- dedi ol.