Anar Fazyljanova: Fılologııalyq bilim berý júıesine reforma kerek
«Eń aldymen, fılologııalyq bilim berý júıesine reforma kerek. Qazaqstandaǵy fılologııa fakýltetterin bitirgen stýdentter men magıstranttardy kúnde kózimiz kóredi. Olardyń alǵany – klassıkalyq fılologııalyq bilim. Odan ary ketpeıdi. Al qazirgi kezde kommýnıkatsııa qubylyp, ózgerip turady. Kommýnıkanttardyń talaptary da qubylmaly. Soǵan qaraı fılologııa mamandyǵyn bitirgen maman tildi durys ári sapaly qoldana alýy kerek», - dedi maman elordadaǵy Prezıdenttiń Ulttyq qoǵamdyq senim keńesindegi qazaq tilin jańǵyrtýǵa baılanysty aıtqan oılary negizinde uıymdastyrylǵan jıynda.
Onyń aıtýynsha, negizgi pánderdiń mazmunyn da ózgertý kerek.
«Mysaly, qazir sıntaksısten klassıkalyq bilimderdi beremiz biz. Sóılemniń qurylysy, sóılem músheleri mektepte de, JOO-larda da oqytylady. Al endi qazirgi sıntaksıs qandaı bolý kerek. Kommýnıtsııanyń alýan túrli salasynda sıntaksıs qandaı bolý kerek degen máselege bas qatyrmaımyz. Máselen, Reseıdegi Lomonosov atyndaǵy ýnıversıtette stýdentter fılologııany 42 mamandandyrylǵan baǵdar boıynsha bitirip shyǵady eken. Bizdiń fılologııada klassıkalyq fılolog shyǵady. Ol adam sol baıaǵy qyrqynshy jyldardan qalǵan baǵdarlamamen mektepte sabaq beredi. Odan qaldy aýdarmamen, ǵylymı jumyspen aınalysady», - dedi ol.
Eske sala ketsek, Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev «qazaq tili órkenıettiń oı-pikirin qalyptastyratyn tildermen qatar turýy kerektigin» aıtqan bolatyn. Ulttyq qoǵamdyq senim keńesiniń 2-otyrysynda QR Prezıdenti latyn álipbıine kóshý máselesinde asyǵystyq tanytýǵa bolmaıtynyn eskertti.
«Qazaq tiline reforma, tipti qajet deseńizder tilimizdi jańǵyrtý qajet. Ǵalymdarymyzdyń salmaqty pikirlerin kútemiz. Taǵy da qaıtalap aıtamyn, biz naqty qazaq tilin reformalaımyz. Mundaı ultymyz úshin taǵdyrsheshti máselede naýqanshyldyqqa jáne jeńiltektikke jol berýge bolmaıdy», - dedi Qasym-Jomart Toqaev.