Ananyń qalaýyn oryndaǵan ul-qyzynyń isi oń bolady - Janseıit Túımebaev

ASTANA. QazAqparat - Búgin Qazaqstan halqy Assambleıasy tóraǵasynyń orynbasary - hatshylyq meńgerýshisi Janseıit Túımebaev elimizdegi etnomádenı birlestikterdiń kópbalaly analarymen kezdesti, dep habarlaıdy QazAqparat tilshisi.

«Búgin ózderińizben Halyqaralyq áıelder kúni qarsańynda kezdesip otyrmyz. Elbasymyz kópbalaly analarǵa qoldaý kórsetý máselesine úlken kóńil bólýde. Ótkende bolǵan «Nur Otan» partııasynyń sezinde de osy máselege nazar aýdardy jáne memleketten arnaıy kómekter uıymdastyrýdy, qoldaý kórsetýdi tapsyrdy. Elbasymyz árbir qazaqstandyq otbasynyń júrgizilip jatqan reformalardyń nátıjesin «alys bolashaqta emes, búgin sezinýi kerektigin» qadap aıtty. Sondaı-aq Elbasymyz áleýmettik qorǵaý salasyn nyǵaıtýǵa, otbasy beriktigin arttyrýǵa, kópbalaly analardy qoldaýǵa arnalǵan shyǵyndardy, olardyń kólemin ulǵaıtýǵa naqty tapsyrmalar berdi», - dedi kezdesýdi ashqan J.Túımebaev. Ol 5-6 naýryz kúnderi elimizdiń barlyq óńirlerinde QHA-nyń aıasynda kópbalaly analardy memlekettik qoldaýdy túsindirýi jáne analarǵa qurmet kórsetýge arnalǵan 75-ten astam shara ótkiziletindigin aıtty. Áleýmettik máseleler, ana otbasy qundylyqtary Assambleıa qyzmetiniń mańyzdy baǵyttarynyń biri bola qalatyndyǵyn jetkizdi. Sonymen qatar jıynǵa qatysqan analardy alda kele jatqan merekelerimen quttyqtady.«Qurmetti analar! «Ananyń qalaýyn oryndaǵan, ananyń aq tilek batasyn alǵan ul-qyzynyń is oń bolady», deıdi halyq danalyǵy. Men Qazaqstan halqy Assambleıasy analardyń muń-muqtajyn nazardan tys qaldyrmaıtynyna senim bildirgim keledi. Kele jatqan merekelerińiz qutty, ómirlerińiz qýanyshta toly bolsyn!», - dedi QHA tóraǵasynyń orynbasary. Kezdesý barysynda Aqmola oblysyndaǵy aýyl mektebiniń muǵalimi tatıana Sartaeva, Pavlodar qalalyq máslıhatynyń depýtaty Gaýhar Ákimqulova, Qaraǵandy qalasyndaǵy mekteptiń orys tili men ádebıeti pániniń oqytýshysy Svetlana Tsemoh sóz sóıledi. Olar elimizde eshbir kópbalaly ana memleket pen qoǵamnyń nazarynan jáne qoldaýynan tys qamlaýy úshin keshendi sharalar qabyldanyp jatqanyn atap ótti. Shara sońynda kópbalaly analarǵa Halyqaralyq áıelder kúnine oraı QHA atynan alǵys hattar men gúl shoqtary tabys etildi.