«Anaǵa aparar jol» AQSh kınoteatrlarynda kórsetiledi

ASTANA. QazAqparat - 2018 jyldyń kúzinde qazaqstandyq rejısser Aqan Sataevtyń «Anaǵa aparar jol» fılmi AQSh kınoteatrlarynan kórsetiledi, dep habarlaıdy QazAqparat.

Bul jańalyqty rejısser óziniń Instagram paraqshasynda jarııalady.

«Dostar, WWMPC (World Wide Motion Pictures) kompanııasy «Anaǵa aparar jol» fılmin AQSh aýmaǵynda kórsetý quqyǵyn ıelendi. Osy kúzde bizdiń fılm AQSh kınoteatrlarynyń prokatyna enedi.  Fılmniń áleýmettik jelidegi jeke paraqshasyn qaraı júrińizder», - dep jazdy Aqan Sataev.

Aıta keteıik, kınoda ananyń sheksiz meıirimi, týǵan jerge adaldyq pen súıispenshilik jaıly syr shertiledi. Sonymen birge, saıası qýǵyn-súrgin, kámpeskeleý, asharshylyq, Ekinshi dúnıejúzilik soǵys syndy qazaq tarıhyndaǵy náýbetter kórsetilgen.

Kartına buǵan deıin de álemdi moıyndatqan bolatyn. Atap aıtqanda, Ispanııa, Reseı, Horvatııa kınofestıvalderinde joǵary marapattardy jeńip aldy. 2018 jyldyń naýryz aıynda «Anaǵa aparar jol» fılmi Nıý-Iorktegi kınofestıvaldiń «Úzdik kórkem fılm» nomınatsııasyn ıelendi.