Ana tilim - ardaǵym: Sheteldegi qazaq balalary arasynda ótken baıqaý máresine jetti

NUR-SULTAN. QazAqparat - 21 aqpan – Halyqaralyq Ana tili kúnine oraı «Otandastar qory» men Dúnıejúzi qazaqtary qaýymdastyǵy ótkizgen «Ana tilim - ardaǵym» halyqaralyq baıqaýynyń nátıjesi belgili boldy. Bul jóninde qordyń baspasóz qyzmetine silteme jasap QazAqparat habarlaıdy.

Baıqaýǵa 2020 jyldyń 1-20 aqpan aralyǵynda sheteldegi (Mońǵolııa, Ózbekstan, Iran, Belarýs elderindegi) etnıkalyq qazaq balalarynan (8-11 synyp oqýshylary) barlyǵy 33 shyǵarma qabyldandy.

Halyqaralyq baıqaýda baq synaǵandar arasynda birinshi oryn 11-synypta oqıtyn mońǵolııalyq Kúnberdi Baqbergenqyzyna buıyrdy. Onyń Abaı týraly shyǵarmasy úzdik atandy. 2-orynǵa ózbekstandyq Gúlbaný Kúmisbaeva men Mońǵolııada turatyn 9-synyp oqýshysy Araı Muharapqyzy ıe boldy. 3-oryn ıegerleri úsheý - ırandyq Narkes Eskeldi, ózbekstandyq Dıana Abdýmýmınova jáne mońǵolııalyq Alıma Silámhanqyzy.

Sondaı-aq, Saıda Abdykamalova (Ózbekstan), Juldyz Erqýat (Mońǵolııa), Nıkıta Goncharenok (Belarýs), Ilıa Goncharenok (Belarýs) jáne Nazerke Seleımanova yntalandyrý syılyǵyn jeńip aldy.

Eske sala keteıik, baıqaýǵa qatysatyn talapkerler «Otandastar» qoryna ǵulama oıshyl Ábý-Nasyr ál-Farabıdiń 1150 jyldyǵy jáne ultymyzdyń uly aqyny Abaıdyń 175 jyldyǵyna arnap óziniń oı-tolǵamyn shaǵyn shyǵarma etip jazýy tıis edi.

Baıqaý sharty boıynsha І oryn alǵan oqýshy «Týǵan elge saıahat» týrıstik poıyzyna bir joldama ıelenedi. II oryn alǵan oqýshylar úshin - Býrabaıdaǵy «Baldáýren» balalar lagerine 2 joldama, III oryn alǵandar úshin - NZM (NISh) lagerine 3 joldama (Nur-Sultan qalasy) qarastyrylǵan.