Ámirjan Qosanov halyqty saılaýǵa belsendi qatysýǵa shaqyrdy
«Qazaqstan úlken saıası naýqannyń aldynda tur. Halyqtyń ókili qatysty deseńizder, osy saılaýda óz úlesin alsyn deseńizder, saılaýǵa kelińizder de, ózińiz qalaǵan kandıdatqa daýys berińizder. Otyryp qalmańyzdar! Saılaý ýchaskesine baryp, janyńyzben de, júregińizben de Qazaqstannyń bolashaǵy úshin tańdaý jasańyzdar!» dedi Á.Qosanov Ortalyq saılaý komıssııasynda ótken baspasóz máslıhatynda.
Aıta keteıik, búgin QR Ortalyq saılaý komıssııasy «Ult taǵdyry» birlesken ulttyq-patrıottyq qozǵalysynyń múshesi, jýrnalıst Ámirjan Qosanovtyń kandıdattyq kýáligin tapsyrdy.
«Orazanyń alǵashqy kúni saılaý komıssııasynyń bizge kýálik bergenin jaqsy yrymǵa balap otyrmyn. 7-shi nómir eken. Men kýálikti jetinshi bolyp alyp otyrmyn. Ony da jaqsylyqqa balap otyrmyn. Jasyratyny joq, meni usyný jáne qol jınaý kezinde biraz kúmán boldy. Osy Qosanov saılaýǵa tirkele me, tirkelmeı me, ártúrli arańdatýlar boldy. Qasaqana jasalǵan bir aqparattyq shabýyldar boldy. Osy kúnge deıin men jáne meniń áriptesterim tirkeý bolmaıtyn shyǵar dep oılady. Biraq búgingi kún Prezıdent Qasym-Jomart Toqaevtyń «ádil saılaý ótkizýge kepildik beremin» degen sóziniń bir nyshany dep bilemin, solaı qabyldaımyn», - dep atap kórsetti Á.Qosanov.