Ámirhan Rahymjanov: Elimizdegi árbir jas órenge zor jaýapkershilik júktelip otyr

ASTANA. QazAqparat - Qazaqstandaǵy árbir jas órenge eldiń keleshegi úshin zor jaýapkershilik júktelip otyr. Jastar jylyna baılanysty Nazarbaev ortalyǵynda ótken jastarmen kezdesýde QR Tuńǵysh Prezıdenti - Elbasy kitaphanasy dırektorynyń birinshi orynbasary, saıası ǵylymdarynyń doktory, professor Ámirhan Rahymjanov osyndaı pikir bildirdi, dep habarlaıdy QazAqparat tilshisi.

«Elbasy el óńirlerindegi jigerli jas býynnyń ókilderimen, jalyndy jastarmen, kreatıvti ári eńbegi zor órendermen kezdesken bolatyn. Qazaqstan tarıhynda jastardyń orny erekshe. Osydan 20 jyl buryn Elbasy óz sheshimimen jastar úshin bolashaqqa jol kórsetip, «Bolashaq» baǵdarlamasyn bekitken edi. Sodan beri birneshe myń stýdent álemniń túkpir-túkpirindegi úzdik ýnıversıtetterde oqyp, qazir el tutqasyn ustar azamattarǵa aınaldy. Almaty qalasynyń ákimi Baýyrjan Baıbek, Shymkent qalasynyń ákimi Ǵabıdolla Ábdirahymov sekildi úlgili azamattar búginde el úshin eńbek etip keledi. Sol sekildi dárigerler men ustazdardyń ishinde, ǵylym salasynda barlyq oblystarda jumys júrgizip jatqan «Bolashaq» túlekteri eline zor paıdasyn tıgizýda», - dedi Ámirhan Rahymjanov.

Professordyń aıtýyna qaraǵanda, talantty jastar men olardyń eńbegi - jarqyn keleshekke jol bastaıdy.

«Bizdiń eldiń progresi, órkendeýi jastarǵa baılanysty bolmaq. Senimmen birge Qazaqstandaǵy árbir jas órenge eldiń keleshegi úshin zor jaýapkershilik júktelip otyr», - dedi Ámirhan Rahymjanov.

Aıta ketsek, Elbasy kitaphanasyndaǵy «Ideıadan shyndyqqa deıin» atty jas kóshbasshylardyń kezdesýinde zamandastaryna úlgi bola bilgen jastar óziniń tabysqa qalaı jetkenin aıtyp berdi. Jastarmen kezdesýge Astana qalasynyń JOO men kolledji stýdentteri aldynda «Kazsed» bas dırektory Almas Tátishev, «Kusto Group» agrodıvızıonynyń basqarýshy dırektory Ernur Aıdarkın, «Astana jastary» resýrstyq ortalyǵynyń damytý bóliminiń basshysy Elvıra Esmuhanova, «Busines School Q4» negizin qalaýshy Dosan Qaýmen qatysty.

Aıta keteıik, 23 qańtarda Elbasy Nursultan Nazarbaevtyń qatysýymen «Táýelsizdik urpaqtary» Jastar jylynyń ashylý saltanaty ótken bolatyn.