Ámire Qashaýbaev atyndaǵy dástúrli oryndaýshylardyń XI Respýblıkalyq baıqaýy ótedi

ASTANA. 18 naýryz. QazAqparat - Qasıetti uly dala úninen qýat alyp, ásem ánderimen tyńdarman jurtyna shýaq bergen uly ánshi Á.Qashaýbaevtyń shyǵarmashylyǵy ulttyq mýzyka ónerindegi qaıtalanbas dara qubylys.

Osy kıeli murany keńinen, tereńinen nasıhattap, urpaqtan-urpaqqa jetkizý, talantty jastarymyzdy ónerdiń káýsar bulaǵynan nár alǵyzyp, sheberligin shyńdaýǵa yqpal etý maqsatynda Mádenıet jáne aqparat mınıstrliginiń Mádenıet komıteti Ámire Qashaýbaev atyndaǵy respýblıkalyq dástúrli oryndaýshylardyń XI baıqaýyn ótkizedi.

Baıqaý 2013 jyldyń 2-5 mamyry aralyǵynda Óskemen qalasynda ótkiziledi. Konkýrsqa Qazaqstan Respýblıkasynda jáne alys-jaqyn shet elderde turatyn 18 men 40 jas aralyǵyndaǵy halyq jáne qazirgi zamanǵy kompozıtorlar ánderin dombyra, qylqobyz, syrnaı aspaptarynyń súıemeldeýinde oryndaıtyn kásibı ónerpazdar qatysa alady. Osynyń aldyndaǵy ótken konkýrstardyń júldeli oryndaryna ıe bolǵan jeńimpazdar atalmysh konkýrsqa qatysa almaıdy.

Úsh kezeńnen turatyn baıqaý kórermender aldynda ótedi. Konkýrsqa qatysýshylar ár kezeńde úsh shyǵarmany jatqa oryndaıdy, sondaı-aq aldyn ala kórsetken shyǵarmalarynyń tizimin ózgerte almaıdy. Konkýrsqa qatysýshylardyń ótinishteri konkýrstyń bastalýyna 15 kún qalǵanǵa deıin qabyldanady.