«Ámire» fılmi Gollıvýd kınofestıvalinde júldege ıe boldy

ASTANA. QazAqparat - AQSh-tyń Los-Andjeles qalasynda qazannyń 23-i men 28-i aralyǵynda ótetin halyqaralyq Hollywood Film Festival kınofestıvaliniń birinshi kezeńinde «Ámire» fılmi Silver Screen Award júldesine ıe boldy, dep habarlaıdy QazAqparat tilshisi «Qazaqfılm» kınostýdııasyna silteme jasap.

Qazaqtyń tenor daýysty birtýar ánshici Ámire Qashaýbaevtyń ǵumyryn baıandaıtyn fılmdi QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ «Dar Play» kompanııasymen birlesip túsirgen.

Aıta ketsek, festıvaldiń alǵashqy kezeńinde Silver Screen Award júldesine úmitkerler qataryna baıqaýǵa qatysatyn ár eldiń birneshe fılmi usynylǵan bolatyn.

Bul kezeńde Qazaqstan atynan alty birdeı kınotýyndy - úsh tolyqmetrajdy jáne úsh qysqametrajdy fılmi tanystyrylǵan. «Ámire» kartınasymen qatar «Qazaqfılm» kınostýdııasy jaryqqa shyǵarǵan úsh fılm kınofestıvalde baq synady. Naqtyraq aıtqanda, tolyqmetrajdy fılmder baıqaýynda Tólegen Baıtókenovtiń «Satash» fılmi jáne Eljas Raqymbekovtyń «El Frıman» kartınasy, al qysqametrajdy fılmder bólimine Berik Jahanovtyń «Asan» fılmi qatysty.

Birinshi kezeńniń jeńimpazy, Silver Screen Award júldesiniń ıegeri «Ámire» fılmi endi Frantsııa, Germanııa, Chılı, Japonııa men Shvetsııa syndy basqa da 16 memleketten qatysatyn fılmdermen birge festıvaldiń basty júldesi úshin baq synaıjy. Bul festıvalde fılmdi rejısser Djeff Vespa tanystyratyn bolady.

Jańa talanttardy ashatyn jáne táýelsiz kınony nasıhattaıtyn Gollıvýdtyk kınofestıval 1997 jyldan bastap ótkizilip keledi.

«Úlken oqıǵalar álemdi ózgertetinin jáne álemimiz ózgeristerdi kútetinin bilemiz. Sonymen qatar, Gollıvýd - álemdik mádenıetti jyrlaıtyn táýelsiz kıno sýretkerler qatary jınalatyn tıimdi ári bedeldi orta»,- deıdi Hollywood Film Festival kınofestıvaliniń uıymdastyrýshylary.