Ámına Ómirzaqovanyń týǵanyna – 101 jyl: «Ana týraly ańyz» fılmi ashyq kórsetilimge shyqty

NUR-SULTAN. QazAqparat – Kórnekti teatr jáne kıno aktrısasy Ámına Ómirzaqovanyń týǵan kúnine oraı, Sh. Aımanov atyndaǵy «Qazaqfılm» kınostýdııasy Youtube arnasynda «Ana týraly ańyz» kórkem fılmin ashyq kórsetilimge shyǵardy, dep habarlaıdy QazAqparat.

101 jyl buryn (1919-2006) aktrısa, Qazaqstannyń halyq ártisi, «Tarlan» syılyǵynyń ıegeri Ámına Erǵojaqyzy Ómirzaqova dúnıege keldi.

Shyǵys Qazaqstan oblysynyń Abaı aýdanynda týǵan. Sankt-Peterbýrg sahna óneri tehnıkýmynyń Qazaq stýdııasyn bitirgen. 1938-1940 jyldary Shymkent oblystyq drama teatrynyń trýppasynda, al 1942-1949 jyldary «Kazaqfılm» stýdııasynda qyzmet atqardy. 1949 jyldan Qazaq akademııalyq jastar men balalar teatrynyń aktrısasy boldy.

«Sh. Aımanov atyndaǵy «Qazaqfılm» AQ bastamasymen Ámına Ómirzaqovanyń 100 jyldyǵyna oraı byltyr «Qazposhta» AQ «Estelik jáne mereıtoılyq datalar» serııasynan poshta markasyn aınalymǵa engizdi», - delingen atalǵan kınostýdııa habarlamasynda.

1963 jyly Á. Ómirzaqova A.Karpovtyń «Ana týraly ańyz» fılminde basty rólde oınaıdy. Bul aktrısanyń mansabyndaǵy eń sátti rólderdiń biri, al fılm – qazaq kınematografııasynyń eń tabysty jumystarynyń biri boldy.