Amerıkalyqtar AQSh prezıdenti saılaýyna merziminen buryn daýys berýde

KLIVLEND. QazAqparat - AQSh-ta prezıdent saılaýynda merziminen buryn daýys berý ótip jatyr. Bul 8 qarashada qandaı da bir sebeptermen saılaý ýchaskesine kele almaıtyn amerıkalyqtar úshin uıymdastyryldy. AQSh-taǵy «QazAqparat» HAA menshikti tilshisi Klıvlend (Ogaıo shtaty) Kaıahoga okrýgi saılaý ýchaskeleriniń birine bardy.

Merziminen buryn daýys berýge belgilengen kúnderdiń ishinde senbide halyqtyń belsendiligi artýda. Negizgi daýys berý kúni - seısenbi jumys kúnine týra kelip tur.

XIX ǵasyrdyń ortasynda AQSh agrarlyq el bolǵan, ol kezde sársenbi bazarda saýda jasaý kúni, al senbi jumys kúni sanalǵan. Jeksenbi qazirgi ýaqytqa deıin shirkeýge qatynaıtyn kún. Sondyqtan da saılaý ótetin kún seısenbige belgilendi.

Demalys kúnderi saılaýshylardyń belsendiligi artýda. Sondyqtan da eki negizgi úmitker «qubylǵysh shtattarda» saılaýaldy úgit-nasıhatty beısenbi men jumaǵa belgiledi.

Ogaıo shtatynda saılaý bıýlletenderi aǵylshyn jáne ıspan tilinde jazylǵan.

Negizgi máseleden basqa, bıýlletenge jergilikti sýdıalyqqa úmitkerlerdi tańdaý engizilgen. Uıymdastyrý jaǵy kóńil toltyrarlyqtaı: ýchaskeler aldynda saılaýaldy úgit-nasıhat shektelgen. Amerıkalyqtar daýys berý úshin tártippen uzyn-sonar kezekke turýda. Ýchaskeniń ishinde múmkindigi shekteýli jandarǵa arnaıy sektsııalar kózdelgen. Saılaýdy teń dárejede Demokratııalyq jáne Respýblıkalyq partııalardan baqylaýshylar baqylaýda. Daýys berý nátıjesin aımaqtyq sottyń arnaıy saıtynda onlaın qaraýǵa bolady.