Amerıkalyq mamandar Arystaǵy saperlerdiń jumysyna baǵa berdi

NUR-SULTAN. QazAqparat - Qorǵanys mınıstri general-leıtenant Nurlan Ermekbaev Arys qalasyndaǵy jarylmaǵan oq-dárilerdi jınaqtaý (joıý) jumystaryn baǵalap, keńes bergen amerıkalyq sarapshylardy, sondaı-aq, Qazaqstan Respýblıkasyndaǵy Amerıka Qurama Shtattarynyń áskerı attashesi polkovnık Bıll Sabany qabyldady, dep habarlaıdy QR QM baspasóz qyzmeti.

General-leıtenant Nurlan Ermekbaev áskerı attashege amerıkalyq sarapshylar júrgizgen tıimdi jumysyna alǵysyn bildirdi.

Qorǵanys vedomstvosynyń basshysy Arystaǵy órt saldaryn joıý jumystary jalǵasyp jatqanyn málimdedi. Qorǵanys mınıstrligi úshin bul mańyzdy másele.

2021 jyldyń 27 sáýiri men 14 mamyry aralyǵynda oq-dárilerdi tazartýǵa jedel den qoıý jasaǵynyń mamandary Mark Tobaıas jáne Gregorı Ford tehnıkalyq aımaqty oq-dári qaldyqtarynan tazartý boıynsha júrgizilgen jáne aldaǵy atqarylatyn jumystarmen tanysty. Olar metall synyqtaryn suryptaıtyn jerdi aralap, oq-dári qaldyqtaryn joıý jumystarynyń júıeliligin zerdeledi.

Mınasyzdandyrý jáne EOD (Explosive Ordnance Disposal) salasyndaǵy sarapshylar jarylmaǵan oq-dárilerdi jınaý men olardy joıýdaǵy saperlerdiń jumysyn joǵary baǵalady.

20 jyldan astam álemniń túrli elderinde qyzmet etken Amerıkalyq mamandar jumystarynda Arys qalasyndaǵy jaǵdaıdy, jarylǵysh zattarmen joǵary deńgeıde uıymdastyrylǵan jumysty jáne onyń sapasyn, ádistemesin esh jerde kezdestirmegenin atap ótti. Olardyń aıtýynsha, qoıma aýmaǵyn jarylý qaýpi bar zattardan tazartý jumystary durys, retimen jáne barynsha qaýipsiz júrgiziledi.

Mark Tobaıas jáne Gregorı Ford órtenbegen jarylǵyshtar men olardyń qaldyqtarynyń ushýyn múlde boldyrmaıtyn arnaıy jabdyqtalǵan orynǵa nazar aýdardy.

Amerıkalyq mamandar sondaı-aq, qazaqstandyq áskerı qyzmetshilerimen aýmaqty jáne qoımalardy tazartý, oq-dárilerdi zalalsyzdandyrý men joıý jóninde keńes berý-ádistemelik jıynyn ótkizdi.

Atalmysh sabaqtar Mınaǵa qarsy qyzmettiń halyqaralyq standarttaryna (IMAS) saı júrgizilgenin atap ótken jón.

Konets formy