Amerıkalyq ınvestorlar Pavlodar oblysynda kartop ósirýi múmkin

PAVLODAR. QazAqparat - Pavlodar oblysynyń Aqsý qalasynda kókónis qoımalaryn salý qarqyn aldy, dep habarlaıdy Pavlodarnews.kz.

«Bizde sýarmaly jerden keıingi ózekti másele – qoıma. Sharýalardyń kóbi kókónis ósiredi, al ol ónimdi saqtaıtyn oryn joq. Sondyqtan bıyl «Vıktorııa» jáne «LıderPVL» sharýa qojalyqtary 20 myń tonnalyq qoıma saldy. «PavlodarNatýrProdýkt» JShS bıyl sýrmaly jerdi 800 gektarǵa ulǵaıtyp, 10 myń tonnaǵa qoıma saldy. «Shyǵys-Alıans» JShS sýarmaly jerdi 210 gektarǵa ulǵaıtty, - dedi Aqsý qalasynyń ákimi Nurlan Dúısembınov jıynda.
Oǵan qosa, qala ákimi kartop óńdeýmen aınalysatyn ınvestorǵa kásiporyn salý úshin úsh oryn kórsetilgenin atap ótti.

«Amerıkalyqtar keldi. Biz olarǵa jylyjaıdyń artyndaǵy, ındýstrııalyq aımaqtaǵy, Úshterek aýylynyń mańyndaǵy oryndardy kórsettik. Olarǵa jaqyn jerde temir jol bolǵany mańyzdy. Qazirgi ýaqytta qarastyrýda», - dedi Nurlan Dúısembınov.

Qala basshysy aldaǵy uzaq ýaqyttyq josparda qant zaýyty men krahmal zaýytyn salý turǵanyn aıtty. Eń birinshi qant zaýyty qolǵa alynady.
Aıta keteıik, jyl basynan beri Aqsý qalasynda negizgi kapıtalǵa ınvestıtsııalardyń 2,6% ósýi baıqalady, ol 60,8 mlrd teńgeni qurady.