Amerıkada Boeing 777 qaptamasy úıdiń aýlasyna qulady

DENVER. QazAqparat – Boeing 777 jolaýshylar ushaǵy Amerıkanyń Denver qalasynan ushyp shyqqannan keıin oń jaq qozǵaltqyshtyń barlyq qaptamasyn joǵaltyp aldy. Onyń synyqtary turǵyn aýdandarǵa túsip, qozǵaltqysh janyp ketken. Bortta da, jerde de eshkim zardap shekken joq, dep habarlaıdy QazAqparat VVS agenttigine silteme jasap.

Bortynda 231 jolaýshy men 10 ekıpaj múshesi bolǵan ushaq aman-esen oralyp, Kolorado shtatynyń Denver áýejaıyna qondy. Zardap shekkender týraly málimet túsken joq.

United Airlines reısi Gonolýlýǵa bet alǵan. AQSh Federaldy azamattyq avıatsııa basqarmasy ushaqtyń oń jaq qozǵaltqyshy isten shyqqanyn habarlady.

Brýmfıld qalasynyń polıtsııasy aýdandardyń birindegi bir qabatty turǵyn úıdiń aldyndaǵy kógaldarda jatqan qozǵaltqysh gondolasynyń aldyńǵy bóligi kórinetin sýretterdi jarııalady.

United Airlines áýe kompanııasy ushqannan keıin qozǵaltqyshtyń isten shyqqanyn rastady. Onyń málimdemesinde Boeing 777 ushý áýejaıyna aman-esen oralǵany aıtylǵan.

Saqtyq sharasy retinde ony apattyq brıgadalar qarsy alǵan, jolaýshylar men ekıpaj músheleriniń jaraqat alǵan-almaǵany týraly habarlanǵan joq.

Qazirgi ýaqytta qozǵaltqyshtyń isten shyǵýyna ne sebep bolǵany belgisiz. Federaldy azamattyq avıatsııa basqarmasy men Kólik qaýipsizdigi jónindegi ulttyq keńes tergeý júrgizedi.