Amerıka ánshisi mánerlep syrǵanaǵan atyraýlyq oqýshyǵa qoldaý bildirdi

ATYRAÝ. QazAqparat – Atyraýda muz ústinde mánerlep syrǵanaǵan 10-synyp oqýshysyna amerıkalyq ánshi qoldaý bildirdi, dep habarlaıdy QazAqparat.

Buǵan deıin atyraýlyq oqýshy Nuralı Bektemirovtiń Kaspıı teńizindegi muz ústinde mánerlep syrǵanaǵanyn habarlaǵan edik.

Nuralı Bektemirovtiń mánerlep syrǵanaǵany túsirilgen vıdeony áleýmettik jeliden amerıkalyq ánshi Zak Greı de kórgen.

Ol atalǵan vıdeony óz paraqshasyna júktegen.

«Sport – densaýlyq kepili. Bala kezimnen sportqa beıimmin, 5-synyptan beri túrli sharaǵa belsene qatysyp kelemin. Ásirese, konkı tebýge, hokkeı oınaýǵa qyzyǵamyn. Aǵam Ádı ózi túsirgen vıdeoǵa AQSh ánshisi Zak Greıdiń ánin qoldanǵan edi. Amerıkalyq oryndaýshy «Osyndaı tamasha týyndyǵa meniń ánim qoıylǵanyna qýanyshtymyn» dep pikirin bildiripti», - deıdi Nuralı Bektemirov.

Atalǵan vıdeony kórgen Zak Greı jýrnalısterge bergen suhbatynda atyraýlyq oqýshy men aǵasyna qoldaý bildirip, alǵys aıtqan.

Aldaǵy ýaqytta Qazaqstanǵa keletin oıy bar ekenin de jetkizgen.