American Airlines reısiniń segiz jolaýshysy jaraqat aldy

VAShINGTON. QazAqparat – Sársenbi kúni Florıda shtatynyń Tampa qalasynan Tennessı shtatynyń Neshvıll qalasyna ushyp bara jatqan American Airlines reısi aýada qatty týrbýlenttilikke ushyrap, Alabama shtatyna qaıta baǵyt aldy. Osydan keıin segiz adam aýrýhanaǵa tústi, dep habarlaıdy QazAqparat CBS News agenttigine silteme jasap.

American Airlines avıakompanııasy «kútpegen týrbýlenttilikke» qaramastan, ushaq Amerıkanyń Bırmıngem qalasyna sátti qondy.

Áýe kompanııasy eki stıýardessa men alty jolaýshy ári qaraı tekserilý úshin aýrýhanaǵa jatqyzylǵanyn rastady.

Zardap shekkenderdiń jaı-kúıi jáne jaraqat alý sebepteri týraly qosymsha aqparat habarlanbaıdy. Embraer E175 bortynda 52 jolaýshy, eki ushqysh jáne eki stıýardessa bolǵan.

Federaldy azamattyq avıatsııa basqarmasy men kóliktegi qaýipsizdigi jónindegi ulttyq keńes oqıǵaǵa qatysty tergeýdi qarastyryp jatqanyn aıtty.

Foto: www.cbsnews.com