Ámbebap bankterde «ıslam terezelerin» ashýǵa múmkindik berilmek

<p>ASTANA. KAZINFORM &ndash; Qarjy naryǵyn retteý jáne damytý agenttigi Memleket basshysynyń tapsyrmasymen ázirlenetin &laquo;Bankter týraly&raquo; jańa zańnyń negizgi novellalaryn atady.</p>

«Memleket basshysy 2024 jylǵy 2 qyrkúıektegi «Ádiletti Qazaqstan: zań jáne tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda ekonomıkalyq belsendilikti yntalandyrý jáne qarjy-tehnologııalyq sektordyń serpindi damýy jónindegi zamanaýı talaptarǵa sáıkes keletin «Bankter týraly» jańa zańdy ázirleý qajettiligi týraly atap ótti. Tapsyrmany iske asyrý úshin agenttik jańa zań ázirleý jáne bank sektoryn retteýdiń jańa tásilderin aıqyndaý boıynsha jumys júrgizýde. Jańa zańdy ázirleý Ulttyq bankpen jáne basqa da múddeli memlekettik organdarmen, bank sektorymen birlesip júzege asyrylatyn bolady», - dep atap ótti agenttikten redaktsııanyń resmı saýalyna bergen jaýabynda.

«Bankter týraly» jańa zań ekonomıkalyq belsendilikti yntalandyrýdyń jáne qarjy-tehnologııalyq sektordyń odan ári serpindi damýynyń ózekti mindetterin sheshýge baǵyttalady.

Agenttik málimetinshe, jańa zańda mynadaı negizgi novellalar bolady:

- enshiles sheteldik bankter men beırezıdent-bankterdiń fılıaldaryn ashýdy yryqtandyrý;

- ekinshi deńgeıdegi bankterdi proportsıonaldy retteýdi engizý;

- ámbebap bankterde «ıslam terezelerin» ashýǵa múmkindik berý;

- tólemge qabiletsiz bankterdi retteý tetigin jetildirý;

- bankterdiń halyqpen jáne bıznespen jumysynyń is-qımyl standarttaryn engizý;

- qarjy-tehnologııalyq kompanııada bankterdi transformatsııalaý úshin jaǵdaı jasaý.