Amankeldi Taspıhovtyń senimdi ókilderi Almaty oblysynda kezdesýler ótkizdi

ALMATY. QazAqparat - QR Prezıdenttigine úmitker Amankeldi Taspıhovtyń Almaty oblystyq shtaby «Keleshek» jastar keńesimen birge «Jiger» atty múgedekterdiń qoǵamdyq birlestigine baryp qaıtty, dep habarlaıdy «Qazaqparat» tilshisi.

Kezdesý barysynda kandıdattyń senimdi ókilderi birlestik múshelerin Amankeldi Taspıhovtyń ómirbaıanymen tanystyryp, saılaýaldy tuǵyrnamanyń negizgi baǵdarlaryn túsindirdi.

Sondaı-aq, «Qazaqstan mádenıet, sport, týrızm jáne aqparat qyzmetkerleriniń salalyq kásibı odaǵy» AQ fılıalynyń bastapqy kásipodaq uıymy sanalatyn №2 arnaıy áleýmettik qyzmet kórsetý ortalyǵynyń ujymynda da osyǵan uqsas kezdesý ótti. Kezdesý barysynda senimdi ókil Álııa Tústikbaeva saılaýaldy tuǵyrnamanyń negizgi baǵyttary men baǵdarlamasyn usyndy.

Eske salsaq, keshe prezıdenttikke kandıdat Jambyl Ahmetbekovtiń Kókshetaý oblystyq saılaýaldy shtaby «RIO» saýda oıyn-saýyq ortalyǵynda fleshmob ótkizgen bolatyn.

Al úmitker Ámirjan Qosanov Pavlodar oblystyq saılaýaldy shtabynyń belsendilerimen jáne jergilikti turǵyndarmen kezdesken.

Sádibek Túgeldiń Túrkistan qalasyndaǵy saılaýaldy shtaby bolsa, «Kıeli jerlerge taǵzym» atty avtosherý uıymdastyrdy.

«Aq jol» partııasy atynan prezıdent saılaýyna túsip jatqan Danııa Espaeva pavlodarlyq kásipkerlermen kezdesip, máselelerin tyńdady.

«Aýyl» partııasy atynan prezıdenttikke kandıdat Tóleýtaı Raqymbekov Mańǵystaý jurtshylyǵyna saılaýaldy baǵdarlamasyn tanystyrdy.

Prezıdentikke taǵy bir úmitker Qasym-Jomart Toqaevtyń shtaby úkimettik emes uıym ókilderimen kezdesken bolatyn. Naqtyraq aıtsaq, elimizdiń birneshe aımaǵynda jergilikti qoǵamdyq shtab músheleri úkimettik emes uıym ókilderimen jáne blogerlermen kezdesken.

Sondaı basqosýdyń biri Jambyl oblysynda uıymdastyryldy.