Amankeldi Taspıhovtyń oblystyq shtabtary úgit-nasıhat jumystaryn bastady
Birinshi kezekte búgin Amankeldi Taspıhovtyń Mańǵystaý oblysy boıynsha saılaýaldy shtaby Jańaózenniń eńbek ujymymen kezdesý ótkizdi. Delegatsııa quramynda: oblystyq qoǵamdyq shtabtyń basshysy, Mańǵystaý oblysynyń Kásipodaq ortalyǵynyń tóraǵasy Kıikbaı Jaýlın, tóraǵanyń orynbasary Telman Mataev, «Ózenmunaıgaz» AQ qyzmetkerleriniń jergilikti kásipodaǵy» QB tóraǵasy Naýryz Saqtaǵanov, Eńbek ardageri, kásipodaqtyń belsendi múshesi Marat Dáýletov jáne oblystyń jergilikti kásipodaqtarynyń basqa da tóraǵalary boldy.
«Kásiptik odaqtar - eńbekshilerdiń múddeleri men quqyqtaryn qorǵaýǵa arnalǵan mańyzdy qoǵamdyq ınstıtýt. Al, Amankeldi Taspıhovtyń alǵa qoıǵan maqsattary: josyqsyz jumys berýshilerdiń jaýapkershiligin kúsheıtý, qyzmetkerlerdiń eńbek quqyqtaryn qamtamasyz etý, qaýipsiz eńbek jaǵdaılary, laıyqty eńbekaqy jáne eńbek kóshi-qonyn retteý sııaqty máseleler. Sondyqtan men osy is-sharanyń barlyq qatysýshylary, barlyq qazaqstandyqtar sııaqty, ózderiniń saılaý ýchaskelerine kelip, óz bolashaǵy úshin, óz balalary men nemereleriniń bolashaǵy úshin Otanymyzdaǵy beıbitshilik pen turaqtylyq úshin daýys beretinine senimdimin», - dedi Kıikbaı Jaýlın.
Іs-sharaǵa qatysýshylar úmitkerdi aldaǵy saılaýda qoldaýǵa daıyn ekendikterin bildirdi.
Sondaı-aq, búgin Taraz qalasyndaǵy M.Dýlatı atyndaǵy memlekettik únıversıtettiń «Jastar saraıynda» QR Prezıdenttigine kandıdat Amankeldi Taspıhovtyń Jambyl oblysy boıynsha senimdi ókilderi oqytýshy - professorlar quramy jáne stýdenttermen jumys kestesine sáıkes úgit-nasıhattyq kezdesýin ótkizdi. Jıynǵa 250-den astam saılaýshy qatysty.
Kezdesýde A. Taspıhovtyń Jambyl oblystyq qoǵamdyq shtabynyń jetekshisi, senimdi ókili M. Tólepbergen saılaýdyń saıası mańyzyn atap kórsete kele kandıdat Amankeldi Taspıhovtyń ómirbaıanymen jáne saılaýaldy tuǵyrnamasymen tanystyryp, kandıdattyń laıyqty eńbegi men azamattyq tulǵasyn jan-jaqty aıtyp berdi.
Kezdesýge qatysýshylar kandıdattyń tuǵyrnamasynyń ózekti jáne eńbekkerlerdiń quqy men múddesin qorǵaý turǵysyndaǵy árbir máselege oraı óz pikirlerin aıtyp, tolǵandyrǵan suraqtaryn qoıdy. Jalpy Qazaqstan kásipodaǵynyń qyzmetin jandandyryp, jańa bıikke kóterý múmkindikterin qoldady.
Jıyn barysynda barlyq salalyq kásipodaq uıymdarynyń jetekshileri de oblys boıynsha bastalǵan alǵashqy alqaly kezdesýge qatysyp, olar da saılaýshylardyń pikirine ún qatty. Osylaısha Jambyl oblysynda úgit-nasıhat tikeleı saılaýshylardyń qatysýmen atqaratyn jumystary óz bastaý aldy.
Eske sala ketsek, keshe QR Prezıdenttigine kandıdat Qasym-Jomart Toqaev Respýblıkalyq qoǵamdyq shtabqa kelip, qyzmetkerlermen kezdesken bolatyn.
Al, QR Prezıdenttigine kandıdat Jambyl Ahmetbekov resmı saıtynda saılaýaldy tuǵyrnamasyn jarııalady.
Sonymen qatar, keshe «Aýyl» xalyqtyq-demokratııalyq patrıottyq partııasynyń saılaýaldy shtabynda jıyn ótti. Onda prezıdenttikke kandıdat Tóleýtaı Raqymbekov óziniń saılaýaldy tuǵyrnamasyn tanystyrdy. Odan bólek, QR Prezıdenttigine kandıdat Ámirjan Qosanov ta óziniń saılaýaldy tuǵyrnamasyn jarııa etti.
Kandıdattardiń birqatary qazirdiń ózinde birshama qyzý jumystardy júrgizip jatyr. Jer-jerde halyqpen kezdesken Prezıdenttikke úmitkerler halyqpen kezdesip, daýys jınaý úshin úgit-nasıhat jumystaryna kirisken. Atap aıtqanda, «Aq jol» partııasynan úmitker Danııa Espaeva Almaty bazarynda jumys isteıtin kásipkerlermen kezdesti.
Al Ámirjan Qosanov saılaýaldy shtabymen Soltústik Qazaqstandy aralap júr.