Amankeldi Taspıhov saılaýaldy tuǵyrnamasyn jarııa etti

NUR-SULTAN. QazAqparat - QR Prezıdenttigine kandıdat Amankeldi Taspıhovtyń saılaýaldy tuǵyrnamasy jarııalandy, dep habarlaıdy QazAqparat tilshisi.

Óz tuǵyrnamasynda jarııa etkendeı, Amankeldi Taspıhov josyqsyz jumys berýshilerdiń jaýapkershiligin arttyrýǵa, qaýipsiz eńbek jaǵdaıyn jasaýǵa, jumysshylardyń eńbek quqyn qamtamasyz etýge, laıyqty eńbekaqynyń tólenýine, eńbek mıgratsııasyn retteýge kúsh salǵaly otyr.

«Biz aýylda jumys oryndaryn ashqan jumys berýshilerdi memleket tarapynan salyq jáne basqa da jeńildikter boıynsha yntalandyrýymyz kerek. Biz memleket esebinen aýyldyq eldi mekenderdi qajet etip otyrǵan mamandyqtar men kásipter boıynsha qamtamasyz etý úshin turǵyndardy oqytý men daǵdylandyrý júıesin jasaý qajet dep sanaımyz. Qazaqstandyqtardyń aýyldyq eldi mekenderde de jaıly ómir súrip, jumys isteýi úshin memleket tarapynan barlyq jaǵdaı jasalýyna qol jetkizetin bolamyz», - deıdi tuǵyrnamasynda Amankeldi Taspıhov.

Aıta keteıik, QR kezekten tys prezıdent saılaýy 2019 jyldyń 9 maýsymyna taǵaıyndalǵan.

11 mamyrda keshki saǵat 18:00-den keıin Qazaqstanda saılaý aldyndaǵy úgit-nasıhat sharalary bastaldy.