Amangeldi Taspıhov Ortalyq saılaý komıssııasyna qujattaryn tapsyrdy

NUR-SULTAN. QazAqparat - Búgin QR Ortalyq saılaý komıssııasyna Amangeldi Taspıhov qujattaryn usyndy, dep habarlaıdy QazAqparat OSK baspasóz qyzmetine silteme jasap.

QR Ortalyq saılaý komıssııasyna «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq zańynyń 55-babyna sáıkes «Qazaqstan Respýblıkasynyń kásipodaqtar federatsııasy» Respýblıkalyq kásipodaqtar birlestigi Qazaqstan Respýblıkasynyń Prezıdenttigine kandıdat retinde Amangeldi Taspıhovtyń qujattaryn usynǵan.

Onyń ishinde kásipodaqtar birlestigi joǵary organynyń QR Prezıdenttigine kandıdat usyný jónindegi otyrysynyń hattamasynan úzindi, Amangeldi Taspıhovtyń kandıdat bolyp saılaýǵa qatysýǵa kelisimi, ómirbaıany, QR OOSK shotyna saılaý jarnasyn aýdarǵanyn kýálandyratyn qujat, jeke kýáliginiń kóshirmesi, JOO dıplomdarynyń kóshirmeleri, memlekettik qyzmettegi ótilin rastaıtyn qujattar bar.

Kandıdattyń memlekettik tildi erkin meńgergendigin anyqtaıtyn lıngvıstıkalyq komıssııasynyń otyrysy 26 sáýirge belgilendi.