Amangeldi Tolamısov áleýmettik qyzmetkerlerdiń jalaqy máselesin kóterdi

<p>ASTANA. KAZINFORM &ndash; Áleýmettik ortalyq qyzmetkerleriniń jalaqysy tómen jáne arnaıy mártebesi joq. Bul týraly búgin Senattyń jalpy otyrysynda vıtse-premer Tamara Dúısenovanyń atyna depýtattyq saýal joldaǵan senator Amangeldi Tolamısov aıtty.</p>

Depýtattyń aqparaty boıynsha, Qazaqstanda qarttar men múgedekterge arnalǵan 118 áleýmettik ortalyq jumys isteıdi. Olar atqaratyn fýnktsııalardyń mańyzdylyǵyna qaramastan, qyzmetkerlerdiń jalaqysy tómen bolyp otyr. Mysaly, elordalyq ortalyqta 10 jyldan astam eńbek ótili bar áleýmettik qyzmetker aıyna 155 myń teńge, al tazalaýshy 87 myń teńge alady. Arnaýly áleýmettik qyzmetterge muqtaj balalardy qoldaý ortalyǵynda jaǵdaı uqsas. Tazalaýshynyń jalaqysy 90 myń teńge, tárbıeshiniń jalaqysy 120 myń teńge, al tárbıeshiniń kómekshisiniń jalaqysy 80-100 myń teńge.

«Múgedektigi bar, ártúrli dıagnozdaǵy tastandy balalarǵa qamqorlyq jasap otyrǵan mekeme qyzmetkerleriniń jumysy asa beınetti ári jaýapkershiligi mol jumys. Olardyń eńbekaqy máselesi kúrdelenip tur. Áleýmettik qyzmet kórsetý ortalyqtaryndaǵy qyzmetkerlerdiń barlyǵynda arnaıy mártebe bar dep aıta almaımyz. Buǵan qosa qyzmettik erekshelikke saı mamandarǵa júkteletin qosymsha aýyr jumystar, atap aıtsaq naýqas balalardyń kútimine fızıkalyq eńbektiń kóbirek jumsalatyndyǵy, keıbir psıhıkalyq naýqastyǵy bar balalardyń tárbıeshilerge kúsh kórsetetindigi, soqqyǵa deıin jetetin jaǵdaılaryndaǵy qyzmetkerlerdiń qorǵalmaýy da kópshilik bile bermeıtin másele. Áleýmettik qyzmet kórsetý ortalyqtaryndaǵy jalaqynyń tómendiginen jáne áleýmettik qorǵalmaǵandyqtan, bul ortalyqtarǵa kásibı bilikti mamandardy jumysqa tartý múmkindigi de joq», - dep atap ótti senator.