Amangeldi aýdanynda sý tasqynynan zardap shekkenderge «Qazaqstan halqyna» qory esebinen úı salyna bastady

<p>QOSTANAI. KAZINFORM - Qostanaı oblysynda zardap shekken aýdan turǵyndaryna memlekettik organdar tarapynan da, bıznes ókilderi tarapynan da jan-jaqty kómek, sonyń ishinde baspana satyp alý jáne jańa úı turǵyzyp berý sııaqty kómek kórsetilip jatyr.</p>

Bul týraly Qostanaı oblysy ákimdiginiń baspasóz qyzmetinen habarlandy.

Foto: Qostanaı oblysynyń ákimdigi

Baspasóz qyzmetiniń málimetterine qaraǵanda, Qostanaı oblysy Amangeldi aýdanynyń Amangeldi, Amantoǵaı, Aǵashtykól, Baıǵabyl, Esir jáne Qarasý aýyldarynyń halqy úshin turǵyn úılerdiń qurylysy bastaldy. Jańa baspana turǵyzyp berýdi Áýlıekól aýdany men Rýdnyı qalasynyń qurylysshylary óz moınyna alyp otyr.

Qurylys Qostanaı oblysynyń ákimdigimen jasalǵan memorandým aıasynda «Qazaqstan halqyna» qoǵamdyq qorynyń qaıyrymdylyq kómegi esebinen bastaldy. Ońtústik óńirlerdegi ár úıdiń qurylysyna qordan 29,5 mln teńge bólingen.

Aıta ketsek, qurylysty tolyq qamtamasyz etý úshin qurylysshylar men tehnıka, sondaı-aq jumysshylarǵa qajetti qural-jabdyqtar Amangeldi aýdanyna aldyn ala jiberildi. Barlyǵy 27 jeke turǵyn úı salý josparlanýda.

Foto: Qostanaı oblysynyń ákimdigi

Esterińizge sala keteıik, Amangeldi jáne Jangeldi aýdandary aýyldarynda «Qazaqstan halqyna» qoǵamdyq qorynyń qaıyrymdylyq kómegi esebinen turǵyn úıler salý jumystary bastalǵan. Tıptik joba boıynsha 68 baspana turǵyzylady. Qazirgi ýaqytta jobalyq-smetalyq qujattama saraptamadan ótýde. Bir úıdiń aldyn ala quny oblystyń shalǵaılyǵy men logıstıkanyń kúrdeliligin eskere otyryp, shamamen 29,5 mıllıon teńgeni quraıdy. Qor bul úılerdiń qurylysyna sáýlet-tehnıkalyq qadaǵalaý qyzmetterin de tóleıtin bolady.

Búgingi tańda Qostanaı oblysynda 473 turǵyn úı qurylys pen satyp alýdyń ártúrli kezeńderinde.

Foto: Qostanaı oblysynyń ákimdigi