«Amanattyq» máslıhat depýtattarynyń forýmy dástúrli sharaǵa aınalady

ASTANA. QazAqparat – AMANAT atynan saılanǵan máslıhat depýtattarynyń respýblıkalyq forýmy dástúrli forýmǵa aınalatyn boldy. Partııa tóraǵasy Erlan Qoshanov forýmnyń plenarlyq otyrysyn qorytyndylaǵan sózinde osyndaı usynys aıtty, dep habarlaıdy QazAqparat tilshisi.

«Bizdiń maqsatymyz aıqyn. Ol – Memleket basshysy qolǵa alǵan reformalardy aıaǵyna deıin tabysty júzege asyrý. Bul baǵytta bıliktiń barlyq tarmaqtarynyń ortaq ustanymy, aýyzbirligi bar ekenin búgingi forým kórsetti dep oılaımyn», - dedi ol.

Erlan Qoshanov bul forým óńirlerden kelgen depýtattarǵa arnalǵanyn eske saldy.

«Osy forýmdy jyl saıyn nemese eki jylda bir ret ótetin dástúrli forýmǵa aınaldyrsaq degen usynys bar. Sizderdiń qol soǵýlaryńyzdy men qoldaý dep túsinip otyrmyn. Bul forým búgingi jıynmen aıaqtalmaıdy. Keler jyly da osylaı jınalyp, Úkimet múshelerin, jergilikti bılik ókilderin shaqyryp, Memlekettik keńesshimiz bar, osyndaı jıynda aqyldasqanymyz jón dep oılaımyn», - dep túıindedi AMANAT tóraǵasy.