«AMANAT» partııasynyń Saılaýaldy baǵdarlamasynyń oryndalýy Májilis depýtattarynyń baqylaýynda

NUR-SULTAN. QazAqparat - Búgin Májilis depýtaty, «AMANAT» partııasy fraktsııasynyń múshesi Ǵalym Ámireev Qyzylorda qalasyna qarasty Qaraýyltóbe aýyldyq okrýginde salynyp jatqan jańa 150 orynǵa shaqtalǵan aýyldyq klýbtyń qurylys jumysymen tanysty.

Partııanyń «Ózgerister joly: ár azamatqa laıyqty ómir» atty Saılaýaldy baǵdarlamasy aıasynda jańadan boı kóterip jatqan áleýmettik nysan osy jyldyń sońynda paıdalanýǵa beriledi, dep habarlaıdy QazAqparat QR parlamenti Májilisiniń baspasóz qyzmetine silteme jasap.

Qazirgi tańda qurylys jumystarynyń 40 paıyzǵa jýyǵy oryndalǵan. Merdigerler qurylys jumystaryn josparǵa sáıkes aıaqtalatynyn aıtady.

«Qazir munda 38 azamat jumys istep jatyr. Іshki sylaq jumystary bastalǵan ýaqytta qosymsha mamandar jumysqa tartylady. Qarjy ýaqytyly bólinip tur. Esh kedergi joq. Qurylys materıaldary jetkilikti. Barynsha sapaly, josparǵa sáıkes jeltoqsan aıynda aıaqtaımyz», – dedi merdiger mekemeniń basshysy Serik Hasenov.

Óz kezeginde depýtat aýyl halqy úshin mádenı nysannyń sapaly ári merziminde aıaqtalýynyń mańyzdy ekendigin atap ótti.

«Ár aýyldyq okrýgtiń ózindik sheshilmegen máseleleri bar. Biz ár kelgen saıyn jergilikti atqarýshy bılikpen birlesip, negizgi máselelerdi qarap, olardyń sheshilýine kúsh salamyz. Qurylys jumystaryna esh eskertý joq. Bizdiń talabymyz bıýdjet qarajaty únemdi jumsalyp, nysan ýaqytyly, sapaly halyq ıgiligine berilse», – dedi Ǵalym Ámireev.

Qazirgi tańda nysanyń qurylys jumystary «AMANAT» partııasynyń baqylaýyna alynyp, arnaıy baqylaý beketi ornatylǵan.

Sonymen qatar búgin Májilis depýtaty «AMANAT» fraktsııasynyń múshesi Syrym Adambaev Almatydaǵy «ASSET» polımerlik buıymdardy óndirý zaýytynyń eńbek ujymymen kezdesti.

«Bizdiń fraktsııa músheleri respýblıka kóleminde kezdesýler ótkizýde. Depýtattar mektepterge, aýrýhanalarǵa, murajaılarǵa, zaýyttarǵa jáne basqa da salynyp jatqan nysandardy aralady. Búgin biz otandyq materıaldar shyǵarylatyn jáne baǵasy shetelden tómen bolatyn Indýstrııalyq aımaqqa bardyq. Sondaı-aq munda arnaıy joǵary oqý ornyn ashý josparlanýda, stýdentter endi tikeleı óndiriste tájirıbeden óte alady. Bul jastar úshin úlken múmkindik, - dedi S.Adambaev.

Jıynda jumysshylar qaladaǵy birqatar máseleni kóterip, joldardyń jaǵdaıyn jaqsartýdy jáne qosymsha jol belgilerin qoıýdy surady.