AMANAT partııasy osy atqa laıyq bolýy kerek - Azamat Satybaldy

ALMATY. QazAqparat- Akter, Temirbek Júrgenov atyndaǵy Qazaq ulttyq óner akademııasynyń rektory Azamat Satybaldy Nur Otan partııasynyń AMANAT bolyp ózgerýi men partııaǵa júktelgen mindetter týraly pikir bildirdi, dep habarlaıdy QazAqparat tilshisi.

«Partııanyń ataýymen birge baǵyt-baǵdary da ózgerdi. Onyń alǵa qoıǵan jospary aýqymdy. Partııa músheleri moınyna júktelgen mindetti abyroımen atqarsa ǵana halyqtyń kóńilinen shyǵady. Sondaı-aq eldiń damýyna orasan zor úles qosady dep oılaımyn. Bizge el de, jer de amanat. Sondyqtan amanatqa qııanat jasamaı, keler urpaqqa qaımaǵyn buzbaı tabys etý bizge amanat. AMANAT partııasy osy atqa laıyqty qyzmet etedi dep senemin»,- deıdi akter.

Spıkerdiń aıtýynsha, depýttar halyqqa jaqyn bolýy kerek.

«Depýttar qarapaıym halyqtyń ishine baryp, problemany kórip qana qoımaı, sezinýi kerek. Tek sol kezde ǵana halyqqa qajetti, eldiń damýyna yqpal etetin zań shyǵarady»,- deıdi Azamat Satybaldy.

Sonymen qatar, ol Jańa Qazaqstandy qurý - Qazaqstan halqynyń ortaq mindeti ekenin eske saldy.

«Qańtar aıynyń basynda Qazaqstan tap bolǵan oqıǵalar elimizdiń tutastyǵy men táýelsizdigine qaýip tóndirgen kúrdeli kezeń boldy. Osy ýaqytta Prezıdenttiń tıimdi sheshimder qabyldap, jaǵdaıdy turaqtandyra alǵanynyń kýási boldyq. Memleket basshysy Jańa Qazaqstan quratynymyzdy aıtty. Onyń baǵyt- baǵdaryn kórsetti. Aıtylǵan oı aıqyn, tapsyrmalar naqty bolǵandyqtan, olardyń abyroımen oryndalatynyna senimdimiz. Jalpy, bul sharýany iske asyrý – búkil Qazaqstan halqynyń ortaq mindeti dep esepteımin»,- deıdi Qazaq ulttyq óner akademııasynyń rektory.