«AMANAT» naýqanshyl partııalardyń qateliginen sabaq alýy kerek - Bıbigúl Bólegenova

NUR-SULTAN. QazAqparat – «AMANAT» naýqanshyl partııalardyń qateliginen sabaq alýy kerek. L.N.Gýmılev atyndaǵy Eýrazııa ulttyq ýnıversıtetiniń professory, saıası ǵylymdardyń kandıdaty Bıbigúl Bólegenova osyndaı pikir bildirdi, dep habarlaıdy QazAqparat tilshisi.

«Keıingi kezde elimizde bolyp jatqan jańalyqtar, ózgerister búkil halyqty alańdatyp otyr. Sonyń ishinde «AMANAT» partııasynyń keshegi ótken sezi de eldiń nazarynda boldy. Árıne, ózgerister kóp bolyp jatyr. Saıası jaǵynan kelsek, Jańa Qazaqstan degen uǵym da eldiń nazarynda. Jańa Qazaqstan qandaı bolady? Oǵan qalaı qol jetkizemiz? Bárimizdiń kókeıimizde osyndaı saýal tur. Sebebi, qazir qoǵamda alshaqtyq kóp. Joǵary bıliktegi adamdar men halyq arasyndaǵy baılanystyń joqtyǵy, áleýmettik jaǵdaıdyń tómendep ketýi qabyrǵamyzǵa aıazdaı batyp otyr», - deıdi Bıbigúl Bólegenova.

Saıasattanýshy «AMANAT» ókilderi saılaý kezinde ǵana jandanyp shyǵa keletin partııalardyń qateligin qaıtalamaýy kerek dep otyr.

«Qazaqstan kóppartııaly júıe qurǵan. Sol partııalar saılaý kezinde ǵana belsendi bolmaı, árdaıym halyqpen birge damyp, birge qadam bassa, Jańa Qazaqstandy qura alatyn edik. «AMANAT» partııasy osyndaı qatelikterden sabaq alady dep oılaımyn», - dedi ǵalym.