«Amanat» azamattyq platformasy saılaý barysyna qatysty alǵashqy esebin jarııalady

NUR-SULTAN. QazAqparat - Saılaýǵa qatysty búgin saǵat 11:00-ge deıin 14 buzýshylyq tirkeldi. Olar negizinen bolmashy sıpattaǵy tehnıkalyq jáne uıymdastyrýshylyq jaǵynan ketken kemshilikter. Bul týraly áleýmettik jelidegi tikeleı efır kezinde «Amanat» azamattyq platformasynyń ókili Murat Ábenov málim etti, dep habarlaıdy QazAqparat tilshisi.

Búgin saǵat 12:00-degi jaǵdaı boıynsha Qazaqstannyń barlyq aýmaǵyndaǵy saılaý ýchaskeleri «Amanat» azamattyq platformasynyń táýesiz baıqaýshylarymen qamtyldy. Qazirgi ýaqytta 10 myńǵa jýyq baıqaýshy men 400-den astam mobıldi kapıtandar barlyq oblystarda baıqaý sharalaryna qatysýda. «Amanat» tarapynan baıqaý sharalary ýaqtyly bastaldy.

«Jalpy, saǵat 11:00-ge deıin 14 buzýshylyq tirkeldi. Sáıkesinshe, olar boıynsha aktiler quryldy, bular kúrdeli emes, bolmashy sıpattaǵy buzýshylyqtar. ıAǵnı, olar tehnıkalyq-uıymdastyrýshylyq sıpattaǵy kemshilikter. Sonymen qatar 50-ge tarta aýyzsha eskertý jasaldy jáne olar boıynsha saılaý komıssııalary shuǵyl sheshim qabyldady», - dedi «Amanat» azamattyq platformasynyń ókili Murat Ábenov.

Osy oraıda ol tuǵyrmanama tarapynan baıqaýshylyq qyzmetti atqaryp júrgen áriptesterin Qazaqstannyń zańdary talaptaryn qatań ustanýǵa shaqyrdy.

M. Ábenov «Amanat» saılaýdy barynsha ashyq ótkizýge úles qosatynyn aıta kele, «bizdiń baıqaýshylar beıtarap ustanymda bolady. Biz arnaıy kodeks ázirledik. Onda biz maqsatymyzdy aıqyndap, buzýshylyqtar anyqtalǵan kezde qandaı is-qımyldar jasaý kerektigin kórsettik», - dedi.

Aıta keteıik, jańadan qurylǵan «Amanat» azamattyq platformasy búgingi saılaýǵa qoǵamdyq monıtorıng júrgizýde. Túrli qoǵamdyq uıym ókilderinen quralǵan top saıası naýqanǵa barynsha belsendi qatysýda. Osylaısha, elimizdegi ár saılaý ýchaskesine «Amanattyń» atynan bir adamnan bekitilgen.