Amalbek Tshanov: Qazaqstannyń Táýelsiz el retinde qalyptasýynda Elbasynyń eńbegi eren

ALMATY. QazAqparat - Qazaqstannyń ár jetistiginde Elbasy - Nursultan Nazarbaevtyń sińirgen eńbegin kórýge bolady. Bul oıymen Respýblıkalyq sport kolledjiniń dırektory, memlekettik qaıratker Amalbek Tshanov bólisti, dep habarlaıdy QazAqparat tilshisi.

Amalbek Tshanov 1990 jyly tuńǵysh demokratııalyq saılaý bolǵanda Shymkent oblysynyń atynan Májilis depýtaty retinde saılandy. Sol sátten bastap memleket qaıratkeri Elbasy Nursultan Ábishulymen jaqynyraq tanysa bastaǵanyn aıtady.

1991 jyly tuńǵysh ret Prezıdent saılaýy bolǵan kezde Ońtústik Qazaqstan oblysy atynan prezıdenttiń senimdi ókili retinde Amalbek Tshanov bekitilipti.

«Bul kezde úlkendi de, kishini de tolǵandyrǵan mazań ýaqyt bolatyn. Áli kúnge esimde Nursultan Ábishuly Nazarbaev Máskeýge baryp, egemendikke baılanysty kóp isterge aralasyp júrdi. Osy máselelerdi sheshý úshin Parlamenttiń Joǵarǵy Keńesiniń qoldaýy da kerek boldy. Bizdermen kelip talqylaıtyn sonyń bárin. Sosyn Máskeýge qaıta ushatyn. Ol kisiniń iskerligine sonda kózim jetti. Kúnde alys saparlarǵa ushýy kerek boldy. Ol kisi sol kezde-aq óte talantty basshy ekenin dáleldedi. Odan buryn da sol kezdegi bolyp jatqan búkil qubylystardyń barlyǵy da túsinikpen saýattylyqpen sheshimin taýyp júrdi», - dedi Amalbek Tshanov.

Onyń aıtýynsha, qazirgi Qazaqstannyń árbir saladaǵy jetistigine Elbasynyń eren eńbegi sińgen.

«Qazir biz álemge belgili tanymal el boldyq. Qaı salada bolmasyn. Men ózim sport salasynda qyzmet isteımin. Qazaqstan birinshi Olımpıadalyq oıyndardan beri álemge belgili sporttan brend memleketke aınalyp keledi. Sonyń barlyǵy Elbasynyń basshylyǵymen, sarabdal jolymen bitip jatqan sharýa», - dedi A.Tshanov.

Ol sheshimin oń tapqan keleli bir másele - Saryarqanyń tósinde Nur-Sultan qalasynyń boı túzeýi ekenin aıtty.

«Astanany ortalyqqa kóshirý máselesi men Joǵarǵy Keńeste júrgen kezde qoıyldy. Bizdiń astanany Aqmolaǵa aýystyrý, jańa derbes qala salý týraly másele kóterildi. Sol bastamanyń jemisin qazir kórip otyrmyz. Nur-Sultan qalasy - saıası, mádenı, ǵylymı ortalyqa aınaldy. Sonymen qatar, Qazaqstan álemge ultaralyq tatýlyǵymen tanymal. Munda kóp ultty halyq turady. Qazaqstan halqy Assambleıasyn qurýynyń ózi de kemeńgerlik pen kóregendiktiń belgisi», - dedi ol.

Foto: turkystan.kz